Dada ahi ilegal, kliente tolu multa $24.000 ba EDTL,E.P
DILI, 29 marsu 2023 (TATOLI)— Komisáriu Ezekutivu Servisu Tékniku no Vogál Konsellu Administrasaun, Eletrisidade de Timor-Leste, Empreza Públika (EDTL,E.P), Latino Jerónimo, hateten iha fulan fevereiru tinan 2023 EDTL,E.P rejistu kliente tolu multa $24.000 tanba halo ligasaun ilegál ba liña eletrisidade.
“Iha fulan fevereiru 2023, dadus ne’ebé to’o mai iha ha’u-nia liman, iha kliente tolu multa $24.000 ba EDTL,E.P tanba deteta halo ligasaun ilegál,” Latino Jerónimo hateten ba jornalista iha nia knaar-fatin, Caicoli, Dili, kuarta ne’e.
Nia dehan, kliente tolu ne’e EDTL,E.P identifika iha Kapitál Dili, ne’ebe maihosi doméstiku rua no ida komersiál.
Notisia relevante : EDTL, E.P rejistu kliente 22 halo ligasaun ilegál ba liña eletrisidade
Kona-ba ligasaun ilegal ne’e, signifika EDTL,E.P monta tiha ona kontador maibé kliente rasik hakarak desliga halo ligasaun ilegal. Ho ida ne’e, identifika regulariza, no penaliza sira tuir dekretu lei númeru 33/2016 17 agostu kona-ba regula enerjia no tarefa eletrisidade.
“Osan ne’ebé sira multa ne’e la’os mai selu iha EDTL,E.P maibé kliente sira ne’e, ba selu direitamente iha banku mak lori resivu mai iha EDTL,E.P,” Latino hateten.
Jornalista : Arminda Fonseca
Editora : Armandina Moniz
