VIKEKE, 25 Marsu 2025 (TATOLI)—Xefe Departamentu Reprezentante Territórial Servisu Agrikultura munisípiu Vikeke, Julio Pinto Ribeiro, informa, daudaun ne’e Departamentu Floresta munisípiu Vikeke prepara ona ai-oan hamutuk 30.200 atu distribui ba komunidade hodi kuda iha kintál.
“Ai-oan sira-ne’e ho tipu oinoin, ne’ebé ita atu fahe ho gratuita ba komunidade,” Julio Pinto Ribeiro, informa ba Agência Tatoli, iha postu Vikeke Vila, tersa ne’e.
Xefe Depatamentu ne’e konsidera, ai sai importante ba ambiente hodi sai matak no prevene mós dezastre naturál sira hanesan rai-halai.
Notísia relevante : Selebra loron mundiál floresta, Governu kuda ai-oan 1.100 iha Ossú
Aleinde ne’e, ai sira-ne’ebé kuda ba futuru iha mós valór ekonómiku tanba iha ai-oan tipu rua hanesan ai-oan komersiál no indústria.
Tanba ne’e, foin lalais Floresta serbisu hamutuk ho parseiru Adventist Development and Relief Agency (ADRA) hodi kuda ai-oan 1.000-resin, iha rai ho medida ektare ida iha parte Larigutu, suku Uagia, ho tipu ai-oan ai-saria, ai-mahoni, ai-kakeu no saburaka, ai-samplon, no kuluzaka kuda.
Floresta Vikeke distribui mós ai-oan hamutuk 7.000 hodi fahe ba komunidade sira iha suku Uagia no Ossu de Cima.
“Ita sei iha ai-oan daudaun ne’e iha hela sentru viveiru tolu. Ami planu ona, iha tempu badak ne’e, ami atu distribui maibé ami-nia difikuldade mak transporte laiha, tanba ne’e maka sei buka dalan hela,” nia akresenta.
Floresta Vikeke tuir loloos fahe ona ba komunidade hodi kuda tanba agora tempu udan.
“Komunidade sira-ne’e interese kuda, mai fó hatene ami no prepara rasik transporte mak foti ai-oan tanba laiha transporte. Karik ami iha transporte mak tula ba komunidade sira-nia fatin,” Xefe Departementu tenik.
Tuir dadus ai-oan sira iha sentru tolu mak hanesan sentru viveiru permanete Raitahau iha 10.200, sentru viveiru temporáriu Uatulari 10.000 no sentru viveiru temporáriu Ossú iha 10.000.
Jornalista : Vitorino Lopes da Costa
Editora : Julia Chatarina
