KOVALIMA, 24 Marsu 2025 (TATOLI) – Governu liuhusi Ministériu Asuntu Kombatente Libertasaun Nasionál (MACLN-Sigla Portugés), loke vaga bolsa estudu 100 ba Kombatente no Martir sira-nia oan iha munisípiu Kovalima ba tinan letivu 2025.
Prezidente Konsellu, Kombatente Libertasaun Nasionál, Munisípiu Kovalima, Osório Soares “Mausoko” esplika,vaga bolsa estudu ne’ebé Ministériu fó sai ne’e fó oportunidade ba veteranu ho grau 8 a 14 , grau 15 a 19 nia oan sira mak bele asesu ba vaga bolsa estudu refereidu.
“Kona-ba vaga bolsa estudu ohin halo ona abertura nune’e ha’u sei envia karga ba sekretáriu zona hotu atu haruka submete sira-nia dokumentu ba ema ne’ebé merese atu asesu bolsa estudu ba tinan letivu 2025”, Osório Soares “Mausoko”, dehan ba jornalista iha Tabakolot, ohin.
Ho nune’e, prezidente Veterenu Kovalima mós sei halo koordenasaun ho diretór eskola hotu, nune’e oinsá mak veteranu nia oan ne’ebé iha kapasidade atu asesu vaga ba bolsa estudu ne’ebé mak Ministériu fó sai ona .
Kona-ba atribuisaun bolsa estudu ba kombatente no martír sira-nia oan, ema ne’ebé bele husu atu hetan bolsa estudu mak hanesan oan husi kombatente libertasaun nasionál ne’ebé mate tanba partisipasaun iha luta ba libertasaun nasionál ne’ebé editadu.
Kombatente libertasuan nasionál sira ne’ebé sei sai benefisiáriu ba pensaun subtánsia ka pensaun espesiál reforma oan husi kombatente editadu ba pensaun.
Ba sira ne’ebé rejista ka halo mátrikula iha tinan letivu 2025 ne’e iha eskola públiku ka privada, ne’ebé hetan akreditasaun ka rekoñesementu husi Ministériu Edukasaun, iha nível ensinu báziku, ensinu sekundáriu no ensinu superiór baxarlatu no lisensiatura.
Aleinde ne’e, ba sira ne’ebé iha aproveitamentu eskolár tinan letivu 2024 hakat pasa eskola iha klase tuirmai iha 2025 ne’e.
Tuir dadus númeru bolsa estudu nívél estudu ba munisípiu hamutuk 100 kompostu husi bolsa estudu primeiru siklu ensinu báziku ema na’in lima, bolsa estudu segundu no terseiru siklu ensinu báziku 15, bolsa estudu ensinu sekundáriu 25, bolsa estudu ensinu superiór rai laran 50 no ensinu superiór rai li’ur na’in-lima.
Jornalista: Celestina Teles
Editór: Rafael Ximenes de A. Belo
