VIKEKE, 25 Marsu 2025 (TATOLI)—Konsellu Kombatente Libertasaun Nasionál (KKLN) munisípiu Vikeke hahú simu filafali reklamasaun ba faze daruak nian husi kombatente sira.
“Ami hahú simu fixa konstestasaun iha segunda horisehik (24/03). Ami simu ema hamutuk na’in-20 maka hatama ona fixa kontestasaun. Oportunidade fó tan fulan-ida ne’ebé sei taka iha loron 18 Abríl ne’e konklui ona. Tanba ne’e, ba kombatente sira-ne’ebé rejista husi tinan 2003 to’o 2009 no dadus sala, tenke prienxe formuláriu kontestasaun hodi hatama bá konsellu hodi haruka bá nasionál halo verifikasaun no finaliza prosesu,” Sekretáriu Ezekutivu KKLN munusípiu Vikeke, Daniel Sarmento ‘Fogeti’, informa ba Agência Tatoli, iha postu Vikeke Vila, tersa ne’e.
Notísia relevante : Kombatente Ossú na’in-100 prienxe ona fixa kontestasaun
Veteranu ne’e dehan, Ministériu Asuntu Kombatente Libertasaun Nasionál (MAKLN) mak iha kompeténsia deside hafoin simu kontestasaun.
“Ita kombatente sira halo kontestasaun ba dadus sira-ne’ebé sala. Ministériu Kombatente mak iha kompeténsia hodi foti dezisaun, atu re-verifika ka oinsá ne’e depende ba ministériu mak hatene,” nia akresenta.
Nune’e, nia husu ba kombatente husi munisípiu Vikeke ne’ebé sente dadus editál sala, bele mai kontesta.
“Ha’u husu ba kombatente sira-ne’ebé rejista iha tinan 2003 no 2009 lista editál sai, dadus balun sala no la kompletu, maibé iha faze dahuluk seidauk halo kontestasaun karik, agora bele mai halo kontestasaun atu ministériu bele haree ita-boot sira-nia dadus. Tanba liu fulan ida-ne’e, sei la simu tan formuláriu konstestasaun. Nune’e ba kombatente sira-ne’ebé antes ne’e hatama ona formuláriu konstestasaun ne’e hein de’it. Faze daruak ida-ne’e ba kombatente sira ne’ebé seidauk hatama formuláriu konstestasaun,” nia hato’o.
Tuir dadus, kombatente husi munisípiu Vikeke ne’ebé rejista iha tinan 2009 hamutuk 7.775 no kombatente ne’ebé liu verifikasaun hamutuk 5.920.
Rezultadu lista validasaun ba kombatente iha Vikeke, kompostu husi postu administrativu Vikeke 1.442, Uatulari 1.868, Uatukarbau 617, Ossu 1.501 no postu Lakluta 512.
Iha faze dahuluk kombatente hamutuk 6.049 mak hato’o ona reklamasaun ba dadus kombatente ne’ebé sala no balun ne’ebé naran la sai.
Jornalista : Vitorino Lopes da Costa
Editora : Julia Chatarina
