ERMERA, 25 Marsu 2025 (TATOLI) – Ministériu Obra Públika (MOP) haluan tan estrada diresaun husi Fatuhada iha Kuartel-Jenerál FALINTIL-Forsa Defeza Timor-Leste (F-FDTL) nia sorin to’o bá estrada boot Hudi-Laran nian.
“Alargamentu estrada ne’e hamutuk metru [luan] 12, husi númeru ne’e ba estrada de’it hamutuk metru 8 no restu ne’e ba bee-dalan, fatin kanalizasaun bee-mos nian husi sorin loos ho karuk, no estrada nia naruk hamutuk metru 670”, Ministru Obra Públika, Samuel Marçal, hateten iha Railaku, ohin.
Governante ne’e agradese ba komunidade Fatuhada no Hudi-Laran, tanba maski sira-nia kioske barak no uma tenke sobu, maibé sira kolabora tebes hodi kontribui ba alargamentu estrada ne’e.
“Sira hatudu duni sira hadomi ba rai ne’e, sobu sira-nia uma, tanba hakarak dezenvolvimentu la’o iha sira-nia uma oin”, dehan.
Daudaun Governu foka uluk ba alaragamentu estrada husi Fatuhada to’o Hudi-Laran, maibé ba oin tékniku sira sei halo dezeñu didi’ak ba estrada no bee-dalan nian mak alarga tan husi Hudi-Laran sa’e ba to’o Ussindu, Surik-Mas no tun bá parte kraik tasi-ibun nian.
Totál uma-kain ne’ebé afetadu ba alargamentu estrada ne’e hamutuk 20-resin.
Notísia relevante: Alargamentu estrada Kuluhun-Bekora ho luan metru 23,74 no naruk kilómetru 4
Jornalista: Arminda Fonseca
Editora: Maria Auxiliadora
