DILI, 26 Marsu 2025 (TATOLI)–Membru Deputadu Komisaun F iha Parlamentu Nasionál ne’ebé trata asuntu Saúde, Seguransa Sosiál no Igualidade Jéneru, foin lalais halo fiskalizasaun ba estabelesimentu fasilidade saúde iha munisípiu Likisá no Bobonaru, durante semana rua tutuir malu.
“Identifika sentru saúde sira iha problema hanesan Ambulánsia multifunsaun kuaze ho kondisaun a’at durante fulan-ida to’o haat. Asuntu ne’e sériu, Ministériu Saúde (MS) presiza tau-atensaun hodi halo manutensaun lalais, tanba ne’e afeta ba transferénsia pasiente bá sentru saúde no ospitál referál. Problema seluk, iha fiskalizasaun deteta to’o agora postu saúde no sentru saúde balun inklui ospitál referál menus rekursu umanu. Hirak ne’ebé destaka la sufisiente atu fó atendimentu ba pasiente,’’ Prezidente Komisaun F, Maria Gorumali Barreto, informa iha resintu Parlamentu Nasionál, kuarta ne’e.
Tanba ne’e, Komisaun F rekomenda nafatin MS atu halo mapamentu di’ak ba rekursu umanu iha ospitál, sentru no postu saúde sira hodi bele responde ba padraun husi Organizasaun Mundiál Saúde (OMS).
Notísia relevante : Fiskalizasaun komisaun F: Fasilidade saúde Aileu-Viqueque atende pasiente ho di’ak
Aleinde ne’e, identifika mós prosesu tarde ba pedidu husi baze mai sentru saúde no mai munisípiu no Institutu Nasionál Farmasia Produtu Médiku (INFPM) rejionál, ne’ebé haruka mai nasionál atu fornese ai-moruk ba baze.
“Ai-moruk item balun iha fasilidade saúde balun la kompletu maibé la’ós stock out iha armazein INFPM nian. Ita husu ba responsável sira hotu husi INFPM no pesoál saúde, farmasista sira iha sentru saúde, postu saúde, pedidu ne’e labele hein to’o ramata mak foin halo, maibé haree ba medikamentu ne’ebé menus ona presiza halo pedidu lalais antes semana rua,” nia hato’o.
Komisaun F mós mós simu preokupasaun husi profisionál saúde ba serbisu turnu ho oras extra hahú husi Setembru 2024 to’o agora seidauk simu subsídiu.
Iha sorin seluk, Deputada membru Komisaun F no Deputada Bankada opozisaun husi Frente Revolusionária do Timor-Leste Independente (FRETILIN), Helena Martins, preokupa ho Ambulánsia atu fasilita tula pasiente iha baze iha sentru saúde balun no ai-moruk item balun la kompletu hanesan atu vasina bebe ba fulan sia laiha.
Jornalista : Nelson de Sousa
Editora : Julia Chatarina
