DILI, 26 Marsu 2025 (TATOLI)-Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente-Jenerál, Domingos Raul “Falur Rate Laek” hala’o enkontru kortézia ho Komandante Jerál Guarda Nasionál Republikana (GNR) Portugal, Rui Alberto Ribeiro Veloso no ekipa iha salaun enkontru kuartel-jenerál, Fatuhada, ohin.
“Sira mai vizita hanesan kumprimenta kortezia de’it, tanba sira-nia kooperasaun ne’e liuliu ho Polísia Nasionál Timor-Leste (PNTL) 25 anos ona, ne’ebé sira nafatin apoiu asesoria. Mas la’ós ida-ne’e de’it sira-nia prezensa iha 2000, 2006, 2008 ka akontesimentu ne’ebé akontese ho prezidente sira-nia prezensa hanesan dezeju ba ita-nia estabilidade nasionál”, Tenente-Jenerál F-FDTL, Domingos Raul “Falur Rate Laek haktuir.
Dirijente ne’e akresenta, “Ohin mós ko’alia kona kooperasaun uitoan kona-ba F-FDTL. No, ha’u atu dehan kooperasaun militar sira, sira mós atu apoiu mós ita-nia ideia ne’e”.
Iha parte seluk, Komandante-Jerál GNR Portugal, Rui Alberto Ribeiro Veloso, aleinde vizita Xefe Estadu Maior-Jenerál F-FDTL, iha mós intensaun seluk atu halo kooperasaun para apoiu servisu seguransa defeza nasionál nian ho instituisaun rua; PNTL no F-FDTL.
“Liliu kona-ba kestaun institutu nasionál defeza rua ne’ebé mantein mós iha área formasaun nian”, Tenente Rui Veloso hateten alende haktuir objetivu vizita kortézia entre autoridade rua – Komandante Jerál GNR no Xefe Estadu Maior Jenerál F-FDTL.
Entretantu, Autoridade másima GNR Portugal ne’e mós hato’o parabéns ba Polísia Nasionál Timor-Leste (PNTL) ne’ebé selebra aniversáriu ba da-25 no dezeju atu sai guarda, seguransa ne’ebé di’ak ho ninia kapasidade rasik, ba nasaun ida-ne’e.
Notísia relevante:Aniversáriu PNTL, PR Horta: Garante ordem públika iha TL
Jornalista: Alexandra da Costa
Editór: Rafael Ximenes de A. Belo
