KOVALIMA, 27 Marsu 2025 ( TATOLI) -Prezidente Repúblika José Ramos Horta dehan, Estadu Timor-Leste harii ona instituisaun PNTL ho nia espesialidade atu garante ordem públika iha Timor-Leste (TL).
Ho nune’e hanesan Xefe Estadu iha ámbitu komemora aniversáriu PNTL iha 2025 ne’e , prezide husi Primeiru-ministru Kay Rala Xanana Gusmão.
“Parabéns ba Estadu Timor-Leste, tanba organiza Estadu tinan 20-resin hodi harii PNTL ho nia espesialidade barak garante ordem públika iha rai laran. Ha’u iha esperiénsia kle’an kona-ba sistema iha Nasoens unidas. Uluk ha’u iha Guiné-Bissau hodi reprezenta Sekretáriu Jerál ONU hodi haree reforma polísia”, Xefe Estadu José Ramos Horta haktuir ba jornalista sira, iha Kovalima, kuarta horseik.
Tuir Xefe Estadu, akompaña iha rai laran hahú iha 1975 momentu FALINTIL hodi haree no akompaña direta.
“Polísia ho defeza ha’u bele hateten instituisaun rua ne’e, PNTL servisu di’ak liu rai barak iha mundu F-FDTL sai forsa di’ak”, nia hateten.
Xefe Estadu kongratula PNTL
Ho nune’e xefe Estadu hato’o parabéns ba PNTL ne’ebé iha loron 27 Marsu ne’e selebra aniversáriu.
Ho aniversáriu PNTL, saida mak presiza atu hadi’a xefe Estadu dehan, ko’alia ho Primeiru-Ministru no Ministériu Interiór, komandante PNTL iha momentu aniversáriu PNTL sa ida mak presiza atu haree tan reponsabilidade Governu.
Entretantu, instituisaun PNTL harii iha tinan-2000. Ezisténsia PNTL refleta haktuir ba Konstituisaun Timor-Leste, Artigu 147.o (Polísia ho forsa seguransa).
- Polísia tenke defende legalidade demokrátika no garante seguransa interna ba sidadaun hotu no la inklina ba partidu.
- Prevensaun krime tenke bazeia ba respeitu direitu umanu.
- Lei maka determina regra no regulamentu ba polísia no forsa seguransa no forsa sira seluk.
Komandante Jerál PNTL oras ne’e daudaun mak Komisáriu Polísia Henrique da Costa no Segundu Komandante Jerál mak Komisáriu Polísia Pedro Belo.
Komemorasaun aniversáriu PNTL ba da-25 ne’e realiza ho tema Hamutuk Ita Hametin Konfiansa.
Jornalista:Celestina Teles
Editór:Rafael Ximenes de A. Belo
