Komisaun B observa dezenvolvimentu PNTL iha progresu di’ak
DILI, 26 Marsu 2025 (TATOLI)—Prezidente Komisaun B iha Parlamentu Nasionál (PN) ne’ebé trata asuntu Negósiu Estranjeiru no Defeza ho Seguransa, Domingos Augosto ‘Deker’, observa dezenvolvimentu instituisaun Polísia Nasionál Timor-Leste (PNTL) iha progresu di’ak, nune’e husu atu kontinua mellora atendimentu ba povu hodi garante seguransa hakmatek.
“Ita bele dehan tinan 20 liubá kotuk, dezempeñamentu, hanesan Prezidente Komisaun B rekoñese buat hotu la’o di’ak, ao pasu sempre iha fallansu, ida-ne’e mak ita-nia realidade, instituisaun hotu-hotu fallansu sempre iha, husi fallansu ita iha aproveita para halo melloramentu ba futuru,” nia hato’o iha resintu PN, relasiona ho aniversáriu ezisténsia PNTL ba dala-25, ne’ebé sei komemora iha kinta (27/03).
Notísia relevante : Ministru Interiór seidauk hanoin atu substitui estrutura atuál PNTL
Deputadu Bankada Governu husi Kongresu Nasionál Rekonstrusaun Timorense (CNRT) ne’e la deskreve detallu kona-ba progresu saida de’it maibé observasaun jerál la’o di’ak no iha esperansa iha ámbitu komemorasaun instituisaun tutela sei halo promosaun ba membru sira ne’ebé hala’o knaar kleur ona hodi bele motiva sira atu nafatin hala’o knaar ho didi’ak.
“Rekomendasaun ba Ministériu no Komandu, pelumenus halo melloramentu ba sira-nia nesesidade sira, aumenta rekrutamentu rekursu umanu iha PNTL ne’ebé menus, nafatin tuir ezijénsia husi baze, se posível iha tinan-tinan kontinua rekrutamentu atu atinje númeru ne’ebé komandu planeia, nune’e kobre atividade hotu iha terrenu atu halo atendimentu di’ak liu ba ita-nia povu,” nia hato’o.
Iha fatin hanesan, Deputadu Bankada Opozisaun husi Kmanek Haburas Unidade Nasionál Timoroan (KHUNTO), Luís Roberto, observa dezempeñu PNTL durante kompleta tinan 25 ninia ezisténsia la’o di’ak tebes.
“Liuliu iha ámbitu komemorasaun ne’e tuir planu sei fó promosaun diviza ba ajente Polísia sira. Ne’e ami sente kontente, tanba nu’udar programa ida, tanba durante ne’e membru sira balun haree ba atiguidade serbisu balun husi klase haat to’o ba klase 36-47 ne’e sira-nia deviza ne’e pendente de’it la sa’e,” Vise-Prezidente Komisaun B ne’e apresia.
Reprezentante povu ne’e nota, infraestrutura edifísiu Polísia nian hanesan eskuadra no postu husi nasionál to’o munisípiu ninia kondisaun seida’uk di’ak, nune’e husu ba Ministériu Interiór no Komandu atu tau-atensaun.
Deputada CNRT, Maria Gorumali Barreto, rekomenda atu bainhira Komandu PNTL halo promosaun diviza no kargu atu tau mós prioridade ba asuntu igualidade jéneru ba feto.
Dadaun PNTL iha membru 4000.
Tuir Konstituisaun Repúblika Demokrátika Timor-Leste (KRDTL) iha artigu 147 (Polísia no forsa seguransa sira) :
1. Polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku.
2. Prevensaun kriminál tenke hala’o ho respeitu ba direitu umanu.
3. Lei maka sei harii rejime ba polísia no mós forsa seguransa seluk.
Jornalista : Nelson de Sousa
Editora : Julia Chatarina
