DILI, 26 Marsu 2025 (TATOLI) – Konsellu Ministru aprova proposta lei, ne’ebé aprezenta husi Primeiru-Ministru, Kay Rala Xanana Gusmão, kona-ba alterasaun daruak ba lei númeru 25/2021, loron 21 fulan-Dezembru, kona-ba Lei Organizasaun Judisiária.
“Alterasaun ne’e ho objetivu atu permite Prezidente Repúblika kontinua atu nomeia Prezidente Tribunál Rekursu to’o instalasaun Supremu Tribunál Justisa, ba mandatu tinan haat”, informa fonte husi Governu.
Lembra katak, iha loron 12 Dezembru, Parlamentu Nasionál aprova projetu-lei númeru 47/V(4a)-alterasaun dahuluk lei Organizasaun Judisiária iha finál globál.
Lei ne’e iha artigu 77 (Instalasaun tribunál judisiál), iha alínea 1 hateten Supremu Tribunál Justisa instaladu prazu másimu fulan 24, sura husi prezente lei tama iha vigór.
Iha alínea 2 haktuir, Tribunál Rekursu instaladu ho prazu máximu fulan 24, konta husi prezente lei tama iha vigór.
Iha artigu 83 (Komisaun Rekrutamentu no Selesaun), iha alínea 1 hateten prazu másimu loron 45 hafoin prezente lei tama vigór, Prezidente Repúblika nomeia husi dekretu Komisaun Rekrutamentu no Selesaun ba primeiru provimentu dos lugares de juízes Supremu Tribunál Justisa no provimentu dos lugares de juiz Tribunál Rekursu.
Iha alínea 2 ko’alia kona-ba komisaun prevista iha númeru anteriór kompostu sidadaun nasionál na’in-tolu. Nune’e, iha alínea 2 a) haktuir; Ida indika husi Prezidente Repúblika, b). Rua indika husi Parlamentu Nasionál, propostu husi bankada parlamentár, forma uninominál, eleitu eskrutíniu sekretu husi deputadu PN.
Notísia relevante: PN aprova alterasaun lei Organizasaun Judisiária iha finál globál
Jornalista: Arminda Fonseca
Editora: Maria Auxiliadora
