MANUFAHI, 25 marsu 2025 (TATOLI) – Ministru Administrasaun Estatál (MAE) fó pose ba Xefe Suku foun Suku Tahu-Bein, Xefe Aldeia no Konsellu Suku Postu Administrativu Alas, Munisípiu Manufahi.
Ministru Administrasaun Estatál, Tomás do Rosário Cabral, iha diskursu hateten, , to’o tempu ona atu servisu hamutuk hodi hadi’a rai ne’e no husu atu para ona ho asaun kontra malu iha governasaun ne’e tanba se uainhira asaun ne’e kontinua povu mak sei sofre.
“Nu’udar responsavel masimu hateten povu nia destinu iha Prezidente Autoridade Munisípiu to’o iha konsellu suku nia liman tanba ne’e husu atu koordena nafatin ho liña ministériu sira hodi tranzita poder lokál to’o iha nível aldeia no povu presiza autoridade sira-nia tulun”, Ministru Tómas Cabral dehan iha salaun administrasaun Autoridade Manufahi, tersa ne’e.
Governante ne’e hatutan, kompeténsia ne’e entrega ona ba autoridade lokál sira hodi koordena hodi realiza atividade sira no kontrola ekipamentu Estadu nian hodi uza tuir interrese komúm la’ós ba ema ida ka pesoál ida nia interrese hodi apoiu ba setór sira ne’ebé presiza dezenvolve hanesan edukasaun, agrikultura no infraestrutura.
Iha oportunidade, Prezidente Autoridade Munisípiu Manufahi, iha entrevista hateten, xefe suku eleitu Tahu-Bein, Ermelindo da Costa promete sei koopera ho instituisaun sira hodi dezenvolve suku ne’e tanba nu’udar suku foun ne’e tanba iha poténsia boot tebes.
“Programa prioridade mak estabelese sede suku hodi apoiu atividade suku foun nian no koordena ho parte relevante hodi prepara fatin ba família sira ne’ebé rejista iha suku ne’e’’, Ermelindo da Costa dehan.
Problema sosiál ne’ebé suku ne’e infrenta mak infraestrutura bázika hanesan estrada hodi perturba komunidade sira hodi lori sira-nia produtu lokál ba fa’an.
Entretantu, partisipa iha serimónia pose ne’e, Prezidente Autoridade Munisípiu Manufahi, Komandante PNTL postu Manufahi, autoridade lokál no komunidade iha munisípiu ne’e.
Jornalista : Joanico de Araújo
Editór: Rafael Ximenes de A. Belo
