DILI, 26 Marsu 2025 (TATOLI)—Ekipa selesaun nasionál Timor-Leste ho naran istimadu ‘Lafaek’ la konsege rekolla vitória iha jogu kualifikasaun tasa Azia 2027 bainhira lakon ho ekipa selesaun Tazakistaun ho golu 1-0.
Notísia Relevante: Timor-Leste sofre golu 0-4 kontra Lebanon iha FIFA Friendly Match
Bainhira oras normál jogu nian la’o, ekipa rua lansa kedan kontra no atake ba malu tuir tékniku no abiliade ekipa ida-idak nian.
Ekipa uma na’in Tazakistaun lakohi fó oportunidade ba ekipa bainaka hodi halo presaun makaas hasoru ekipa Lafaek. Husi presaun ne’e la hela de’it hanesan presaun, tanba iha minutu tolu (3) jogadór uma na’in Vahadat Hanonov susesu lees ona rede Timor-Leste nian hodi muda rezultadu ba 1-0.
Husi rezultadu ne’ebé iha halo ekipa uma na’in kontente hodi selebra golu ne’e ho kalma, maibé ekipa Lafaek la nonook kontinua hatudu jogu ne’ebé bonitu.
Maibé jogu hirak ne’ebé Timor-Leste hao hela de’it hanesan jogu tanba la rezulta golu ruma, nune’e to’o oras primeira parte termina laiha tan golu ruma mak akontese no rezultadu hela ho 1-0, entaun ekipa uma na’in mak lidera jogu provizoriu.
Dolar ba segunda parte, ekipa rua nafatin halo presaun ba malu, Timor-Leste esforsu atu halo jogu ne’e empata maibé Tazikistaun la fó fatin, nune’e rezultadu kontinua metin ho 1-0.
Tazakistaun mós kontinua luta maibé ekipa Timor-Leste tenta hamate tutuir Tazakistaun nia jogu, ikus labele rezulta tan golu no to’o minutu ikus iha segunda parte termina, vitoria hela ba Tazakistaun no Timor-Leste hela ho zero. Maske lakon maibé jogadór sira konsege hatudu jogu ne’ebé kompetetivu nian.
Duelu Tazakistaun vs Timor-Leste hala’o iha Estadiu Pamir, tersa (25 Marsu) kalan iha oras Tazikistaun.
Iha jogu kualifikasaun ne’e, Timor-Leste tama iha Grupu A hamutuk ho Tazikistaun, Maldivas no Filipina.
Jogu ne’e, ekipa ida iha pódiu aas liu sei hetan billete ida ba finál tasa Ázia Arábia Saudita 2027 nian.
Oportunidade Timor-Leste nian nakloke nafatin maske lakon ona jogu ida, maibé konsidera katak El Lafaek hetan ona apoiu husi jogadór naturalizadu sira balun.
Ho derrota mihis ne’ebé ekipa Lafaek hetan, jornalista TATOLI kontaktu kedan ho treinadór prinsipáln Simón Elissetche,lamenta tebes ho golu ne’ebé Tazakistaun halo iha minutu primeira parte, maibé nia orgullu ho jogadór ekipa selesaun nasionál Timot-Leste sira-nia esforsu.
“Lamentavelmente, golu iha minutu priméru kondisiona jogu no halo ita-nia atake sira kois liu atu dezenvolve planu jogu ne’ebé ita lakon ona. Tanba, ita hakarak atu kontinua ho porteria zero liu tempu, para ita bele aproveita espasu sira-ne’ebé sira sei husik. Maibé, golu ne’e fó konfiansa ba sira no permite sira kontinua ho estrutura defensiva forte iha kontra-atake. Ita tenke kontinua halo servisu, prosesu ida-ne’e naruk no ita tenke kontinua mellora jogu ba jogu,” Simón hateten.
Simón adianta tan, jogu ne’e la’o iha ámbitu di’ak tebes, Timor-Leste iha oportunidade atu halo empata maibé la konsege.
“Iha jogu ohin, ita bele konkorre ho selesaun ida-ne’ebé kuaze pozisaun 100 iha ranking FIFA,” nia tenik.
Iha jogu ne’e, Timor-Leste laiha jogadór prinsipál rua ne’ebé di’ak-liu mak (Gali Freitas no John Frith), maibé iha jogu kontra Maldivas fiar katak jogadór rua ne’e bele hamutuk ona ho ekipa Lafaek.
Jornalista : Hortencio Sanchez
Editór : Cancio Ximenes
