DILI, 21 Marsu 2025 (TATOLI)—Ekipa selesaun nasionál ho naran istimadu Lafaek obrigadu tenke sofre golu 0-4 kontra Lebanon iha jogu amigavel Federation International Football Asosiation (FIFA) ka jogu FIFA Friendly Match.
Notísia Relevante: Jogadór timoroan husi Austrália sei kompleta dokumentu antes reforsa selesaun nasionál
Jogu amigavel ne’e hanesan meiu ida hodi koko Timor-Leste nia forsa ba jogu kualifikasaun Tasa Azia 2027 ne’ebé Timor-Leste sei kontra Tazakistaun iha 25 fulan-Marsu ne’e iha Tazakistaun.
Iha joga ne’e, Jogadór selesaun nasionál Timor-Leste Starting Eleven ne’ebé Prepara la konsege rekolla vitória maibé konsege hatudu jogu ne’ebé kompetetivu.
Jogu ba ekipa rua realiza iha Stádiun Al Khor, Doha, Qatar sesta madrugada ne’e.
Bainhira jogu la’o iha kampu laran tuir orientasaun árbitru nian, ekipa rua lansa kedan kontra no atake ba malu tuir tékniku no abiliade ekipa ida-idak nian, Timor-Leste tenka halo kontra atake maibé la konsege harahun Lebanon nia liña klaran no defeza.
Lebanon mós la nonok responde ho atake maibé ekipa Lafaek la fó fatin, nune’e jogu la’o to’o minutu 45 primeira faze termina rezultadu hela ho empata 0-0.
Hakat ba segubda faze, Lebano halo mudansa total ba nia jogu iha lina klaran, ikus hatudu jogu ne’ebé brillante hodi hamonu duni ekipa Lafaek ne’ebé lidera husi treinadór nasionalidade Xile Simón Elissetche. Nune’e to’o jogu minutu 90 termina, Timor-Leste tenke sofre golu 0-4.
Jogu International FIFA Friendly Match ne’ebe Timor-Leste joga hasoru nasaun Lebanon, ne’ebé tuir ranking FIFA, Lebanon iha kualifikasaun 112 no Timor-Leste iha kualifikasaun 197.
Jogu entre ekipa rua tuir estatistika ne’ebé iha hatudu katak, Ball Possession Timor-Leste 39 no Lebanon 69, totál tiru bola ne’e Timor-Leste ida (1) no Lebanon 13, marka kona iha alvu ne’e Timor-Leste zero (0) no Lebanon hitu (7), kontra atake perigozu ne’e Timor-Leste 35 no Lebanon 92, xutu livre parte rua zero (0), Bola kantu Timor-Leste zero (0) mo Lebanon hitu (7), kartaun mean no kinur ekipa rua zero tanba la halo erru barak durante jogu.
Husi derrota ne’e, Jornalista TATOLI kontaktu treinadór selesaun nasionál Simón Elissetche no nia hateten jogu kontra Lebano importante tebe-tebes ba Timor-Leste nia preparasaun ikus antes jogu ofisiál kontra Tazakistaun.
“Ami enfrenta ka hasoru ekipa forte, ne’ebé iha jogadór sira-ne’ebé joga iha Europa no Amérika Latina. Tanba ne’e, ha’u kontente ho ha’u-nia jogadór sira-nia dezempeñu, sira mós hatudu dixiplina tátika ne’ebé de’it ami prepara ona,” Simón hateten ba Agência Tatoli liuhusi HgatsApp (WA), sesta ne’e.
Nia dehan, ekipa jogadór selesaun nasionál susesu ba halo defende ne’ebé forte no iha tempu ne’ebé hanesan, jogadór sira mós hetan oportunidade barak atu kontrola bola no ataka ho risku. Infelizmente, iha tempu daruak, erru individual fó posibilade ba Lebanon atu marka golu primeiru. Depois ne’e, ekipa se;esaun nasionál kontinua ho estrutura hanesan, halo jogu di’ak no hetan dezempeñu ne’ebé ema hotu hakarak.
“Ami deside atu troka jogadór hotu-hotu iha meiu-kampu no atake iha minutu ikus sira ba fó deskansa ba jogadór titulár sira atu prepara ba jogu ofisiál kontra Tazakistaun. Lebanon aproveita momentu ne’e atu halo golu tolu iha minutu lima ikus-liu,” treinadór ne’e tenik.
Nia hatutan, Planu jogu ne’e hala’o di’ak-liu husi jogadór Timor-Leste sira no konsege konkorénsia ho ekipa ne’ebé superiór liu.
“Ami kontente ho ita-nia jogadór sira-nia dezepeñu, maske ami laiha jogadór prinsipál haat: John Frith, Gali Freitas, João Pedro no Mouzinho. Maibé, ami bele kontinua konkorénsia. Agora, ami fokús ba jogu ofisiál kontra Tazakistaun,” nia dehan.
Tuir treinadór ne’e, jogu kontra Lebano fó oportunidade ba ekipa Lafaek atu ajusta detallu ikus antes jogu ofisiál kontra Tazakistaun.
“Aban, ami sei viajen ba Dushanbe atu joga iha loron 25 Marsu 2025 kontra Tazakistaun,” nia dehan.
Notísia Relevante: Ekipa selesaun nasionál halo preparasaun iha Malázia atu hasoru Lebanon-Tazakistan
Jornalista : Hortencio Sanchez
Editór : Cancio Ximenes
