DILI, 12 Marsu 2025 (TATOLI)—Diretór Servisu Selesaun Nasional Federasaun Futeból Timor-Leste (FFTL), João Maneco Soares Amaral, hateten daudaun jogadór ekipa selesaun nasionál halo preparasaun iha Malázia atu kompete iha jogu kontra Lebanon no Tazakistaun.
“Ita-nia selesaun halo preparasaun iha Malázia la’o di’ak. Sira-nia preparasaun iha Malázia ne’e ami konsidera hanesan faze konsolidasaun antes sira aranka ba jogu amigavel tuir kalendáriu FIFA (Federation International Football Assosiation) hasoru Lebanon iha Doha 20 marsu agora,” Diretór ne’e hateten ba Agência TATOLI iha edifisiu FFTL Dili, kuarta ne’e.
Nia dehan, preparasaun selesaun nasionál iha Malázia atu enfrenta mós jogu kualifikasaun Tasa AFC 2027 ne’ebé Timor-Leste sei kontra Tazakistan iha loron 25 fulan-Marsu 2025 ne’e no Tazakistan rasik mak sei sai hanesan uma-na’in.
Ho preparasaun ekipa selesaun nasionál ne’ebé lideradu treinadór Simón Elissetche hala’o iha Malázia agora ne’e sei lori rezultadu di’ak ba Timor-Leste.
Selesaun Nasional Timor-Leste, hala’o treinamentu iha Kampu Sport Tizza home of football, Kuala Lumpur, Malázia hodi halo preparasaun ba jogu kualifikasaun Tasa AFC 2027-Ronde Datoluk, ne’ebé Timor-Leste sei joga hasoru Tazakistaun.
Lista jogadór selesaun nasionál
Lista jogadór ne’ebé tama iha ekipa selesaun nasionál mak hanesan;
- Junildo Pereira
- Natalino Soares
- Tristan Oliveira
- João Panji Soares
- Filomeno da Costa
- Francisco da Costa
- Ricardo Bianco
- Anizio Correia
- Amancio Araujo
- Almerito da Silva
- Mario Quintão
- Santiago da Costa
- Claudio Osorio
- Frentiliano dos Santos
- Palomito Ribeiro
- Kornelis Portela
- Edencio Soares
- Luis Figo
- Alexandro Lemos
- Vavio Pires
- Paul Gusmão
- Elias Mesquita
- Olagar Xavier
- Zenivio Mota
- João Pedro
- Georgino da Silva
- Paulo Gali Freitas.
Antes jogadór selasaun nasionál dezloka ba Malázia hodi hala’o preparasaun, Prezidnte FFTL, Nilton T. Gusmão dos Santos fó motivasaun ba Ekipa Selesaun Nasionál Timor-Leste ne’ebé aranka ba Malázia iha tersa (04 Marsu 2025), atu hala’o Training Center (TC) ka preparasaun ba joga hasoru Tazakistan iha kualifikasaun kopa Ázia Saude Arabia 2027.
Prezidente FFTL ko’alia ho Ekipa Selesaun Nasional ne’ebé kompostu husi jogadór hamutuk ema na’in-22 ho ofisiál sira iha salaun Xanana Sport Center atu motiva jogadór sira ba hatudu jogu ho espíritu nasionalizmu.
Prezidente FFTL husu ekipa selesaun nasional Timor-Leste atu nafatin hatudu dixiplina no talentu iha ema-nia rain, nune’e bele tane dignidade futeból Timor nian iha mundu.
Antes dezloka ba Malázia, selesaun nasional mós uza atributu kultura Timor-Leste nian ho hanoin ida atu hatudu nafatin identidade Timor nian ba iha mundu no bele mós hanesan husu autorizasaun ba kultura Timor antes atu aranka ba partisipa jogu iha rai-li’ur. ekipa selesaun nasional mós hala’o vizita ba Mahein FFTL, São João Bosco iha edifísiu FFTL.
Jornalista : Hortencio Sanchez
Editór : Cancio Ximenes
