DILI, 26 Marsu 2025 (TATOLI) – Ministériu Edukasaun (ME) sei taka eskola internasionál sira ne’ebé harii latuir padraun mínimu, la tuir regulamentu no laiha lisensiamentu husi ministériu.
Ministra Edukasaun, Dulce de Jesus, informa katak ministériu identifika iha eskola internasionál barak mak eziste iha Timor-Leste, maibé seidauk rejista iha ministériu.
Nia dehan padraun mínimu husi Ministériu Edukasaun mak harii eskola internasionál tenke iha infraestrutura adekuada, kualidade profesór, tenke iha areadór no seluk tan. “Maibé la prienxe padraun sira ne’e ami sei taka”, Dulce de Jesus afirma iha Palásiu Governu.
Lembra katak ME suspende temporariamente konsesaun lisensiamentu operasionál ba estabelesimentu eskola internasionál husi Ensinu Pré-eskolár, Ensinu Báziku no Sekundáriu iha Timor-Leste.
Medida suspensaun ne’e esklui eskola sira neʼebé hetan ona lisensa operasionál, sira neʼebé hatama ona pedidu antes no la kumpre rekizitu legál sira. Maibé, konsensaun iha prazu tinan ida atu kumpre kondisaun tuir regulamentu lisensiamentu operasionál.
Eskola internasionál ne’ebé hetan ona lisensamentu operasionál, husi 2020 to’o 2023, husi nivel eskolaridade hamutuk 15.
Iha 2024, ME simu tan pedidu operasionál hamutuk 20, maibé 15 mak hetan aprovasaun. Husi 15 ne’e, Ensinu Báziku neen, Pré-Eskolár haat, Ensinu Sekundáriu haat no Tékniku Vokasionál ida.
Notísia relevante: ME suspende lisensiamentu operasionál ba eskola internasionál
Jornalista: Arminda Fonseca
Editora: Maria Auxiliadora
