DILI, 27 Marsu 2025 (TATOLI)–Membru Polísia Nasionál Timor-Leste (PNTL) hamutuk 2.000-resin hetan promosaun diviza, iha ámbitu komemorasaun ezisténsia ba dala-25, ho tema ‘Hamutuk Hametin Konfiansa’.
Promosaun ba membru PNTL liuhusi rejime tranzitóriu, ne’ebé previstu iha estatutu Polisiál PNTL, aprovadu husi dekretu-lei númeru 35/2024, 18 Outubru.
Husi númeru 2000-resin ne’e, promovidu ba iha postu Superintendente Asistente iha na’in-120, ba postu Inspetór Xefe 211, ba postu Inspetór 228, ba postu Superintendente Asistente 793, ba postu Sarjente Xefe 817 no ba postu Primeiru Aarjentu 569.
Membru sira ne’ebé Komandu halo promosaun tula deviza ba sira, maihusi reprezentasaun munisípiu hotu.
“Ohin ita hala’o promosaun tranzitóriu ba membru sira hotu no kuaze 68% benefisia ba promosaun referidu. Parabéns ba imi hotu, diviza no farda ne’ebé ita uza ne povu nian, responsabiliza ba diviza ne’ebé imi simu,” Komandante Jerál (KomJer) PNTL Komisáriu Jerál Polísia Henrique da Costa, hato’o iha diskursu, iha resintu Palásiu Governu, kinta ne’e.
Notísia relevante : KomJer PNTL apela ba membru halakon arogánsia no atuasaun la tuir prosedimentu
Nia hateten, hafoin promosaun ida-ne’e, Komandu sei jere hodi koloka ba asume kargu iha ne’ebé de’it iha terrotóriu Timor Leste.
“Balun uluk sai hanesan kondutór de’it dala ruma nia sa’e liu fali nia Komandante. Ita tenke simu mós realidade ida-ne’e. Ida-ne’e mak ita bolu katak mudansa, hatudu nafatin imi-nia disiplina, respeita malu, kamaradajen, unidade, no lealdade ba superiór sira,’’ nia akresenta.
Komandante Jerál Polísia, dehan, promosaun ida-ne’e fó mós serbisu boot ida ba Komandu atu nune’e kria formasaun ne’ebé adekuadu.
“Ho meiu ida-ne’e mak bele ajuda sira hodi asegura diviza foun ne’ebe sira simu. Tau iha ita hotu nia neon katak, populasaun sira izije atendimentu Polísia nian ho profisional, signifika katak ita tenke hadi’a kualidade. Ha’u fiar katak ho apoiu Governu nian no kbiit ne’ebé PNTL iha, ita bele asegura kualidade atendimentu,’’ nia otimista.
Biban ne’e, Komandante Jerál ne’e hato’o agradesimentu ba IX Governu Konstitusionál ne’ebé lidera husi Primeiru-Ministru, Kay Rala Xanana Gusmão, ne’ebé sempre tau-matan mai PNTL.
Tomas Aquino, nu’udar veteranu no antigu membru PNTL, sente kontente ho promosaun ne’e tanba antes ne’e nia ho deviza Inspetor Xefe maibé agora ba postu Asistente Superintentende ho modalidade grau primeiru.
Nune’e mós, membru Polísia, Domigos Gama, ne’ebé hala’o knaar tinan barak ona sente kontente tanba antes ne’e ho deviza Inspetór Polísia, hetan promosaun ba Asistente Superintendente.
Jornalista : Nelson de Sousa
Editora : Julia Chatarina
