DILI, 27 Marsu 2025 (TATOLI)–Komandante Jerál (KomJer) Polísia Nasionál Timor-Leste (PNTL), Komisáriu Jerál Polísia Henrique da Costa, apela ba nia mebru sira atu halokon arogánsia no atuasaun la tuir prosedimentu.
“Hahú husi ha’u hanesan Komandante Jerál no Segundu Komandante Jerál, ofisiál, sarjentu, ajente, ita hotu, Polísia iha tamba iha povu. Serví Estadu no povu ho lolos. Respeita ita-nia povu, sira ne’e mesak ita-nia inan, aman, feton, nan, maun, alin, oan. Halakon arogánsia, foti-an, la respeitu ema, bobar lia, atuasaun la tuir prosedimentu. Hahalok hirak ne’e hatudu momos la profisionál. Hahalok hirak ne’e mak kontribui hodi hatun krebilidade Estadu no imajen instituisaun hodi hamihis konfiansa povu no Estadu mai PNTL,’’ KomJer hato’o iha diskursu iha ámbitu komemorasaun aniversáru ezisténsia PNTL ba dala-25 ho tema ‘Hamutuk Hametin Konfiansa’, iha resintu Palásiu Governu, kinta ne’e.
Notísia relevante : KomJer PNTL komprometidu fó atendimentu di’ak hodi hetan konfiansa husi povu
Nia dehan, hametin pás no seguransa interna inklui medida prevensaun krime sai atensaun prioridade ba PNTL liuhusi hasa’e prezensa Polísia fardadu sira, hasa’e volume patrola, reforsa seguransa iha fronteira, kontrola tasi no seluk tan.
“Dadus kriminál hatudu katak joven barak komete krime, eskola oan sira, labarik minoridade sira. Tanba ne, PNTL esbelese programa Polísia vizita bá eskola (Police goes to School) no Police goes to University, Polísia visita bá uma hodi halo edukasaun sívika no rona direta sira-nia preokupasaun no envolvimentu iha atividade Polísia hanesan desportu, limpeza, no diskusaun sira. Ida-ne’e hanesan psikoterapia ida, ita hahú oituan atu muda mentalidade sira atu respeita ema seluk, kultura hadomi vida, kuda espíritu nasionalizmu iha sira-nia an, no hadomi nia nasaun,” nia akresenta.
Komisáriu Jerál Polísia iha esperansa tanba nota katak joven sira mesak luta-na’in nia oan de’it, tanba ne’e sira sei kontinua kuidadu Timor-Leste nia independénsia.
“Servisu hirak ne’e la fásil, maibé fiar katak ema hotu sei tulun PNTL hodi atinje atividade hirak ne’e,” nia otimista.
Tuir Konstituisaun Repúblika Demokrátika Timor-Leste (KRDTL) iha artigu artigu 147 (Polísia no forsa seguransa sira):
- Polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku.
- Prevensaun kriminál tenke hala’o ho respeitu ba direitu umanu.
- Lei maka sei harii rejime ba polísia no mós forsa seguransa seluk.
Jornalista : Nelson de Sousa
Editora : Julia Chatarina
