KomJer PNTL komprometidu fó atendimentu di’ak hodi hetan konfiansa husi povu
DILI, 27 Marsu 2025 (TATOLI)—Komandu Jerál Polísia Nasionál Timor-Leste (PNTL) hamutuk ho órgaun Estadu no instituisaun relevante sira, kinta ne’e, komemora aniversáru ezisténsia PNTL ba dala-25 ho tema ‘Hamutuk Hametin Konfiansa’.
“Aniversáriu tinan ne’e, mai ho nia lema ‘Hamutuk Hametin Konfiansa’ ninia sentidu katak PNTL presiza serbisu hamutuk ho entidade hotu, komunidade, joven feto no mane, veteranu, lidér relijiozu, eskola, líder komunitáriu sira, atu nune’e ita bele fornese atendimentu ne’ebé di’ak no lais hodi hetan konfiansa husi povu,” Komandante Jerál (KomJer) PNTL Komisáriu Jerál Polísia, Henrique da Costa, hato’o iha nia diskursu, iha ámbitu komemorasaun aniversáriu ezisténsia PNTL, iha Palásiu Governu.
Nia husu atu membru sira tenke unidu iha Instituisaun nia laran, disiplina, no lealdade hodi rona ba irárkia Komandu.
“Labele mete ba polítika sira-nia serbisu, labele mete tan grupu arte-marsiál no arte-rituál sira, tamba ita halo juramentu bebeik ona maibé komunidade sei nafatin ko’alia kona-ba ita-nia neutralidade ba atendimentu sira iha terrenu. Komandante sira tenke inovativu, buka apreende barak hodi kria atividade sira tuir prioridade lima Komandu nian iha ida-idak nia komandu,” KomJer fó hanoin.
Notísia relevante : Aniversáriu PNTL, PR Horta: Garante ordem públika iha TL
Nia deskreve estatístikamente, relatóriu kona-ba krime tun oituan iha tinan kotuk (2024), kompara ho tinan 2023, maibé nafatin iha nível preokupasaun ema hotu nian no problema hirak ne’e labele haree hanesan simples de’it, maibé tenke hetan aprosimasaun husi perspetiva multidisiplinária no envolve Governu, instituisaun seluk no komunidade hodi prevene no kombate.
“Asidente viasaun nian mós halakon vida 100 liu iha tinan 2024, ne’ebé kauza husi ema no infrastrutura hanesan estrada no sinais no fatór natureza. PNTL tau ida-ne’e ba atensaun a’as hodi dezeña programa prevensaun, edukasaun sívika, no aplika lei ho forte ba autór sira,” Henrique da Costa, katak.
Iha parte seluk, bele mós kontribui rendimentu ba Estadu liuhusi aplika multa sira, ne’ebé PNTL halo ona koordenasaun ho parseiru sira atu implementa programa ida-ne’e.
Nia reforsa, sidadaun ida labele sente orgullu ba buat ne’ebé mane ka feto sira halo ona ba seguransa iha nasaun ne’e, tanba ita sei iha dalan naruk atu perkore ba buat hirak nebe seidauk realiza.
“Atu halo ida-ne’e, ita presiza rezolve kestaun balun iha área rekursu umanu, ezemplu rekrutamentu ajente foun no promosaun. Ha’u kontinua konta ho imi atu ita iha unidade ida ne’ebé forte no serbisu hamutuk, unidade bele sai forsa ida de’it hodi asegura nasaun no povu Timor Leste. Povu Timor-Leste sei apoiu ita, Nai Maromak sei nafatin tulun ita hotu hodi halo serbisu ho loloos no hadook PNTL no Timor-Leste husi hanoin a’at sira,’’ nia apela.
Eventu ne’e partisipa husi Primeiru-Ministru, Kay Rala Xanana Gusmão, Prezidente Parlamentu Nasionál, Maria Fernanda Lay, membru IX Governu Konstitisionál, korpu diplomátiku, membru PNTL inklui konvidadu sira seluk.
Jornalista : Nelson de Sousa
Editora : Julia Chatarina
