DILI, 28 Marsu 2025 (TATOLI)—Inspetora Jerál Autoridade Inspesaun, Fiskalizasaun Atividade Ekonómika, Sanitária no Alimentár (AIFAESA), Odete Viegas, husu ba empreza Burger King Timor Plaza atu hato’o reklamasaun bainhira la satifáz ho servisu AIFAESA.
“Husu ba empreza Burger King Timor Plaza bele hato’o reklamasaun, tanba ami hala’ o servisu ida-ne’e atu labele iha risku ba saúde ema-nian,” Odete Viegas hateten ba jornalista sira iha Tibar, Postu Administrativu Bazartete, Munisípiu Likisá, sesta ne’e.
Nia afirma, banhira empreza ida halo sala tenke rekoñese aan, labele defende sira-nia sala, tanba esperiénsia lubuk ona ba iha empreza balun katak sira tenke kumpri ba regra sira-ne’ebé mak AIFAESA fó.
“Empreza Burger King komete irregularidade tanba prepara na’an ladún di’ak, maibé ninia ambiente ijiene. Entaun, nia nafatin halo atividade komersiál, maibé nia sei hetan sansaun ba koima no selu tuir gravidade ne’ebé mak sira komete. Empreza Burger King agora iha hela notifikasaun relatóriu. Banhira to’o ona iha ha’u-nia meza mak ita foin hatene nia komete erru saida,” nia relata.
Notísia relevante: AIFAESA taka padaria Brasão tanba komete irregularidade
Antes ne’e, iha loron 26 Marsu, ekipa AIFAESA deteta produtu estragadu iha Burger King Timor Plaza. Husi atividade ne’e, ekipa AIFAESA konsege deteta na’an ”beef” estragadu ne’ebé sei rai hela iha jelera laran.
Enkuantu, produtu hirak-ne’e, ekipa inspetór sira rekolla kedas hodi asegura iha edifisiu AIFAESA. Sei kontinua halo destroisaun iha tempu tuirmai. Hafoin ne’e, inspetór responsável opeasionál entrega mós karta konvokatóriu bá iha empreza referida hodimai marka prezensa iha edifisiu AIFAESA Matadouru.
Jornalista: Felicidade Ximenes
Editór: Xisto Freitas da Piedade
