VIKEKE, 28 Marsu 2025 (TATOLI)—Ministru Administrasaun Estatal, Tomás do Rosário Cabaral, sesta ne’e, inaugura edifísiu administrasaun postu administrativu Ossú inklui morru protesaun hodi apoiu servisu administrasaun atende no serbí povu.
Ministru Administrasaun Estatal, Tomás do Rosário Cabaral, hateten edifísiu ne’ebé foin inaugura hodi destaka ninia dezeñu ne’ebé modernu no estruturadu ho di’ak, maibé presiza kuda ai-funan hodi hafurak liután edifísiu ne’e, inklui kuda fali ai-oan hodi proteje rai labele halai.
“Ha’u husu ba autoridade atu aloka orsamentál iha tinan oin, para hadi’a fali edifísiu tuan tanba edifisiu ne’e istóriku husi tempu koloniál portugés nian, hodi prezerva hanesan parte ida husi patrimóniu nasaun nian ba jerasaun sira iha futuru. Ha’u hanoin imi-nia fatin ne’e di’ak, fatin ne’e ita hotu nian no Estadu nian, atu servi Unidade Administrativu ida-ne’e, para povu bele asesu ba servisu sira ho fasil liu no atendimentu ba povu ne’e besik liu. Ida-ne’e mak importante duni,” Ministru ne’e hateten iha serimónia inaugurasaun edifísiu postu Ossú, ohin.
Governante ne’e husu Prezidente Autoridade Munisipál Vikeke ho ekipa tenke hakas-aan no prepara aan ba kompetisaun futuru Podér Lokál, para bele iha ona direitu polítiku no orsamentu permanente.
“Ha’u entrega hela autoridade ne’e ho nia Ekipa ba servisu Desentralizasaun, Governu aprova ona rezolusaun, 2027 depois Eleisaun Prezidensiál, bele iha Poder Lokál, para imi iha orsamentu permanente, se lae orsamentu hotu tenke deside iha sentrál. Maibé ita-boot sira mak besik liu ba populasuan no loron-kalan akompaña hela Povu nia susar,” nia hateten.
Nia dehan, prepara aan ba hodi halo kompetisaun atu deside futuru administrasaun ka futuru poder lokál, nune’e bele iha ona diretu politiku tanba agora ne’e iha de’it diretu Administrativu ho Finanseiru, tanba ne’e mak Viqueque tenke hakas aan para bele ultrapasa tiha tranzisaun tinan rua ne’e.
“Nune’e, iha futuru bele iha Asembleia no bele iha ona Munisípiu. Tinan ida-ne’e kontrusaun ba edifísiu administrasaun munisipâl iha Vikeke. Tinan oin, ita hahú fali Asembleia, edifisiu rua ne’e iha ona, prienxe ona kritériu, postu administrativu sira funsiona prienxe ona kritériu, para povu ho ita-boot sira labele bein de’it servisu husi nasionál,” nia dehan.
Aleinde ne’e, nia dehan, iha tinan ida-ne’e sei loke sentru atendimentu Balkaun Úniku iha Munisípiu Vikeke hodi lori Governasaun besik liubá povu Vikeke.
Inaugurasaun edifísiu Ossú husi Ministru Administrasaun Estatal, Tomás do Rosário Cabaral, no akompañadu husi PAM Vikeke, Francisco C.S de Gonzaga Soares. Edifísiu referida hetan bensaun husi Padre Pároku Santa Teresinha do Menino Jesus Ossú.
Enkuantu, konstrusaun edifísiu Administradór Postu Administrativu Ossú ne’ebé kontratu ho empreza Diranova Unipesoál, Lda, ho valór orsamentu $242.358.65 ne’ebé finansia husi orsamentu PDIM 2023.
Serimónia inaugurasaun ne’e partisipa husi Diretór Nasionál MAE, Autoridade Seguransa, autoridade lokál, Diretór Servisu Munisipál, Tékniku PDIM ho funsionáriu postu administrativu no komunidade Ossú.
Notísia Relevante: Konstrusaun edifísiu administrasaun postu Ossu no morru protesaun kuaze konklui
Jornalista : Vitorino Lopes da Costa
Editór : Cancio Ximenes
