Ministru Tomás nota Vikeke iha poténsia ba Kámara Munisipál
VIKEKE, 28 Marsu 2025 (TATOLI)–Ministru Administrasaun Estatál, Tomás do Rosário Cabral, nota katak munisípiu Vikeke iha poténsia ba Kámara Munisipál.
“Ha’u haree Vikeke iha potensialidade bele ba Kámara Munisipál, maibé autoridade sira hanesan Xefe suku, Administradór postu no Autoridade munisípiu sira tenke koordena malu no tenke serbisu maka’as,” Ministru Tomás hateten iha resintu Administrasaun munisípiu Vikeke, sesta ne’e.
Governu lokál maka orgaun Governu ka administrasaun lokál iha kraik ne’ebé kompostu husi orgaun Kámara Munisipál nu’udar ezekutivu no orgaun Asembleia Munisipál nu’udar legizlativu ne’ebé hili direitamente husi povu.
Notísia relevante : Vise-Ministru Jacinto Rigoberto konsidera Viqueque poténsia sai kámara munisipál
Governante ne’e dehan, Vikeke bele ona implementa poder lokál no desentralizasaun iha tinan 2027, bainhira preparadu hotu.
“Ha’u hakarak relata iha munisípiu Vikeke iha Diretór Servisu munisipál hamutuk na’in-19 hodi apoiu serbisu iha baze, liuliu vizita ba suku sira iha Vikeke,” nia akresenta.
Ministériu Administrasaun Estatál (MAE) entrega ona Prezidente Autoridade Munisípiu (PAM) no Diretór Servisu Munisipál sira-ne’e atu lori munisípiu Vikeke ba poder lokál no dezentralizasaun.
“Tanba ne’e, atu implementa programa ne’e sei haree munisípiu sira ne’ebé prienxe, hafoin sai poder lokál. Kuandu implementa ona iha autónomu finanseiru, administrativu no polítiku. Orsamentu Jeral Estadu kada tinan sei hasai 20% hodi fó ba munisípiu hodi jere. Daudaun ne’e, munisípiu sira simu envolope fiskál maibé seidauk pakote fiskál,” Ministru esplika.
Biban ne’e, Ministru husu ba Autoridade lokál sira atu serbisu hamutuk ho PAM hodi lori munisípiu Vikeke ba poder lokál iha trmpu badak.
“Karik buat ruma mak autoridade sira presiza ajuda, fó hatene ba MAE hodi mai ajuda Autoridade Vikeke. Tanba ministériu sentrál oras ne’e poder munisípiu, maibé ministériu sentrál ninia serbisu mak fó asisténsia tékniku ba ita-boot sira,” nia reforsa.
Tomás Cabral dezafia Autoridade sira iha tinan ida-ne’e atu halo preparasaun di’ak.
“Ha’u haree Vikeke fásil tebes atu sai munisípiu tanba organiza malu di’ak tanba ida-ne’e mós sai sasukat ida ba implementa podor lokál,” nia tenik.
Jornalista : Vitorino Lopes da Costa
Editór : Cancio Ximenes
