KOVALIMA, 01 Abríl 2025 (TATOLI) – Autoridade Nasionál no Petróleu (ANP) daudaun ne’e iha hela prosesu atu kria regra téknika atu regulariza negosiante fa’an kombustível retallu ka haknauk iha Aqua fa’an iha estrada-ninin sira.
“Ita-nia regulamentu ne’ebé kategoriza atividade grosir (retallu) atividade ne’ebé mak lei bandu atu eziste iha kapitál munisípiu iha fatin ne’ebé estasaun própriu postu abastesimentu iha ona, maibé iha área remota bazeia ba nesesidade konsumidór ita bele autoriza” Jerente Jerál Administrasaun Lisensiamentu no operasaun downstream, Juvencia Costa, haktuir ba TATOLI, iha salaun AMC, ohin.
Ho nune’e ANP hakarak partilla katak daudaun ne’e ANP iha prosesu atu estabelese regra téknika ida atu bele regulariza atividade ne’ebé la’ós estasaun própriu kombustível.
Razaun atu kria regra téknika daudaun ne’e tipu ekipamentu mini sentru abastesimentu kombustível barak mak utiliza iha rai laran ne’ebé la prienxe rekezitu, tanba ne’e ANP hakarak estabelese regra téknika ida atu regulariza.
“Kria regra téknika ita hakarak tau haree bazeia ba seguransa, kualidade no kuantidade hodi hatuur iha ita-nia regra téknika hodi regula atividade retallu sira ne’ebé mak seidauk kobre iha regulamentu kona-ba estasaun konbustivél ne’ebé iha ona. Prosesu ita seidauk estabelese ami prepara ona atu bele halo diskusaun ita bele iha regulamentu ida-ne’e”, nia relata.
Iha sorin seluk, Xefe Suku Belekasak, Leonito Gusmão, bazeia ba informasaun husi Autoridade Nasionál Petróleu, kombustível ne’ebé fa’an iha estrada-ninin la iha kualidade nune’e estraga karreta no motorizada sira.
“Ita hatene iha munisípiu maioria enxe konbustível ne’ebé negosiante sira fa’an konbustível iha Aqua tanba ne’e presiza atu kontrola nune’e sira bele utiliza ekipamentu ne’ebé kualidade”, nia rekomenda.
Tuir observasaun Jornalista TATOLI nota iha terrenu katak, negosiante ne’ebé fa’an mina iha dalan-ninin sosa kombustível iha karreta tanke iha masa litru 35 ho folin $ 47 nune’e negosiante sira fa’an Aqua boot ho nakonu ho folin $ 2.00 no Aqua boot nanotak iha folin $ 1,50 no folin $ 1.00
Jornalista: Celestina Teles
Editór: Rafael Ximenes de A. Belo
