DILI, 01 Abríl 2025 (TATOLI)–Deputadu Bankada Governu husi Kongresu Nasionál Rekonstrusaun Timorense (CNRT), Saul Salvador, husu Governu atu reforsa reforma justisa.
“Liga ho preokupasaun públiku, ne’ebé kona-ba defisiénsia autór justisa bainhira foti desizaun ba kazu ne’ebé povu hasoru, justisa daudaun komesa atu grave. Tanba ne’e reforsa reforma justisa agora, ezemplu kazu foin daudaun ne’e mosu agresaun no atake ba Tribunál Primeiru Instánsia Dili, kona-ba desizaun juís sira ba vítima alin oan feto Zima ne’ebé mate iha Delta rezulta husi motorista ida,” Deputadu ne’e hato’o liuhusi reuniaun plenária Parlamentu Nasionál (PN), tersa ne’e.
Nia nota, kondisaun ne’e akontese tanba família vítima konsidera desizaun Tribunál nian la justu ba sira.
“Ba situasaun ida-ne’e, hanesan Deputadu CNRT, hato’o ha’u-nia solidariedade ba família alin oan feto Zima atu kontinua korrajen no luta nafatin hodi hetan justisa,” nia hato’o.
Notísia relevante : MJ prepara ona ezbosu lei 20-resin ba reforma justisa
Reprezentante povu ne’e hateten, liga ho problema kestaun justisa mak atuál Primeriu-Ministru, Kay Rala Xanana Gusmão, desde tinan tinan barak nia laran preokupa tebes ho dezenvolvimentu setór justisa.
Nia nota, IX Governu Konstituisionál halao ona esforsu liuhusi estabelesimentu Komisaun Reforma Justisa atu haree defisiénsia husi autór judisiáriu sira no lei sira hodi nune’e rekonstrui konfiansa ba instituisaun judisiáriu hanesan Tribunál, Ministériu Públiku, Defensória Públika no seluk tan.
“Kazu alin oan feto Zima no kazu seluk tan komesa halo públiku komesa lakon fiar ba instituisaun judisiáriu, tanba dahuluk Tribunál agora la’ós ona fatin ba buka justisa,” nia tenik.
Deputadu Bankada CNRT dehan, tuir loloos Ministériu Públiku ne’ebé hanesan na’in ba prosesu penál labele aseita envolvimentu membru juís sira hodi foti desizaun ba plenária ne’ebé nakonu ho konflitu interese.
“Ba ida-ne’e husu ba Governu atu aselera reforma justisa, halo avaliasaun ba autór judisiáriu sira no harii lalais Tribunál Supremu Justisa atu nune’e Tribunál bele la’o ho di’ak, imparsiál, profisionál no foti desizaun justu,” nia rekomenda.
Vise-Ministru ba asuntu Parlamentár, Adérito Hugo da Costa, hateten, IX Governu ho konsiénte ba defisiénsia iha setórhotu ho detallu hanesan setór justisa nian, nune’e Primeiru-Ministru rasik harii gabinete ba reforma justisa nian.
Jornalista : Nelson de Sousa
Editora : Julia Chatarina
