DILI, 01 Abríl 2025 (TATOLI)—Deputada Bankada Opozisaun husi Partidu Libertasaun Populár (PLP), Maria Angelina Sarmento Lopes, halo krítika relasiona ho promosaun tranzitóriu ba membru Polísia Nasionál Timor-Leste (PNTL).
“Ha’u hakarak hato’o parabéns ba PNTL nia aniversáriu ba dala-25. Iha intervensaun ida ne’e hakarak liga oituan ho promosaun tranzitória ba PNTL ne’ebé foin hala’o iha semana kotuk. Governu ida-idak iha nia polítika rasik sobre promosaun kareira, maibé presizamente tuir dalan no regra. Tuir informasaun katak promosaun ida-ne’e barak mak hetan politizasaun tanba desizaun la’ós foti husi Komandu, maibé foti husi asesór iha Ministériu Interiór. Promosaun tranzitória mós la tuir eskada, balun haksoit eskada 1, balun fali haksoit eskada 3-4 kedan, hanesan sira ne’ebé Inspetór Asistente haksoit liu ba Asistente Xefe, balun fali haksoit liu kedan ba Superintendente Asistente,” nia hato’o liuhusi reuniaun plenária Parlamentu Nasionál (PN), tersa ne’e.
Notísia relevante : Membru PNTL 2.000-resin promovidu iha ámbitu komemorasaun ezisténsia ba dala-25
Tuir nia, kondisaun ne’e sei kria konfuzaun ba PNTL no irárkia sei lakon, autoridade Komandu lakon no sei implika mós lakon obidiénsia iha instituisaun PNTL.
“Aleinde ne’e, halo estrutura nível topu bubu tia iha klaran, PNTL nia osan saláriu no vensimentu sei sa’e boot loos kompara ho instituisaun Estado hotu. Piór liután, promosaun ida-ne’e haree liu ba kór partidu ka ema ne’ebé mak sira koñese. Promosaun ne’e, sé mak hetan liu mak ema hirak nebe hala’o knaar nu’udar seguransa pesoál ba membru Governu sira daudaun,” nia akresenta.
Nune’e, Deputada ne’e husu ba Governu bainhira atu halo promosaun tranzitóriu bele sae diviza maibé tuir eskada pur eskada.
“Sa’e eskada dala 1 ou 2, labele haksoit bá to’o 3 ka 4. Promosaun ida-ne’e mós tenke haree nia impaktu ba orsamentu Estadu, tanba promosaun ida-ne’e halo ema hotu kontente maibé sei fó impaktu ba ita-nia orsamentu,” nia reforsa.
Deputadu Bankada Governu husi Kongresu Nasionál Rekonstrusaun Timorense (CNRT), Natalino dos Santos, parabeniza PNTL ne’ebé komemora aniversáriu ba dala- 25.
“Apresia mós Ministériu Interiór, avansu boot ida ne’ebé IX Governu Konstituisionál halo no tinan 25 konsege PNTL hetan nia estatutu no ida mós depois tanba tinan 10-resin ajente sira ne’ebé la hetan promosaun bele hetan promosaun foin daudaun liubá ne’e susesu idane’ebé halo,” nia apresia.
Deputadu CNRT, Oscar de Araújo, fó apresiasaun ba IX Governu liuhusi Ministériu Interiór ne’ebé bele halo ona promosaun hodi konsidera membru PNTL ne’ebé hanesan lutu ba nasaun tinan barak ona, bele hetan promosaun atu dignifika sira-nia kontribuisaun ba povu hanesan lutu ba nasaun.
Deputada CNRT, Cedelízia Farria dos Santos, mós apresia Governu liuhusi Ministériu Interiór no Komandu PNTL ne’ebé bele halo ona promosaun ba membru PNTL sira ho númeru boot hodi fó onra ba sira-nia serbisu no dedikasaun tomak ba rai ida-ne’e.
Vise-Ministru ba asuntu Parlamentár, Adérito Hugo da Costa, hateten, reforma iha setór seguransa, iha semana kotuk, iha ámbitu aniversáriu ba dala-25 IX Governua arranka ho programa reforma iha setór ne’e ninian kaer ba faktu iha últimu mandatu VIII Governu.
“Triste tebes reforma obrigatóriu ba membru 158 Polísia efetivu komesa ofisiál, Sarjentu to’o Ajente dedika sira-nia an durante tinan 10 to’o 20 ita halo reforma iha últimu mandatu saida mak ita hakarak iha ne’e. La fó sala ba sé, mais faktu ida ita tenke hadi’a sasán, ita labele kontente asiste netik família husi sira ne’ebé promovidu kontente halo apresiasaun ba Ministériu Interiór no Governu dehan ami primeira vez haree agradese ba Governu ida ne’e,” nia hato’o.
Aleinde ne’e, iha ona projesaun ba sira-nia futuru atu reforma tinan 65, sira-nia deviza másimu to’o ne’ebé no atu tuir teste Polísia rekrutamentu karik hatene ona nia hahú husi ajente no sei termina ho saida.
Rejime tranzitóriu atu ultrapasa ho dezorganizasaun durante tinan 25 PNTL nian.
“Agora dehan ita kestiona balun haksoit liubá deviza rua, tolu. Sim refleta avaliasaun sira ida-idak nia dedikasaun balun ativista rezisténsia no balun kuadru rezisténsia sein iha promosaun durante tinan 20, ita halo promosaun liuhusi avaliasaun dignu dignifika sira-nia dezempeñu tinan barak nia laran,” nia katak.
Governante ne’e subliña, rejime tranzitóriu ne’e atu hakotu ona kualkér espasu intervensaun sira husi li’ur no reforma ne’e la halo iha períodu polítiku ka eventu kampaña tanba ne’e medida sira ne’e introdús atu dignifika setór sira.
Jornalista : Nelson de Sousa
Editora : Julia Chatarina
