BOBONARU,01 Abríl 2025 (TATOLI)—Diresaun Nasionál Transporte Públika (DNTT) delegasaun territoriál munisípiu Bobonaru iha tempu badak sei koloka funsionáriu na’in-neen (6) iha terminál ka estasionamentu Maliana no Tunubibi hodi kontrola sirkulasaun Transporte Públiku.
Diretór DNTT delegasaun territoriál munisípiu Bobonaru, Tomas Maia, hateten dezlokasaun funsionáriu ne’e hanesan preparasaun ida bainhira projetu estrada Urbana Maliana finaliza bele organiza didi’ak konetividade transporte públiku.
Notísia Relevante: PNTL ho DNTT Bobonaro halo apreensaun ba motorizada 53
“Funsionáriu sira-nia atividade diária mak pasa informasaun ba motorista transporte públiku. Aliende ne’e, haree mós dukumentu hanesan lisensa mate, ita fó hanoin atu nune’e labele selu multa to’o $400 ho $500,” Diretór DNTT Munisípiu Bobonaru ne’e informa ba Agência Tatoli iha nia kan’ar fatin, tersa ne’e
Funsionáriu hirak ne’e, nia dehan, sei halo mós jestaun pasajeiru ba konetividade transporte públiku husi kapitál Dili mai Maliana no husi postu administrativu mai kapitál munisípiu Bobonaru liuhusi aplika pasang ret.
“Ha’u durante ne’e observa tuku 01h00 dadeer to’o tuku 16h00 lorokraik ne’e, ita-nia Maliana ne’e mamuk no hakmatek loos, entaun ita prepara para movimentu ne’e husi dadeer to’o lrokraik, tanba iha ne’ebá pasang ret ona,” nia dehan.
Reprezentante komunidade Maliana, Ricardo Baptista Amaral, konsidera planu ne’e bele responde ona pasajeiru sira-nia preokupasaun durante ne’e.
“Se DNTT nia ema iha ona, ha’ u hanoin ba oin konjak (ajudante motorista) sira mós ladún hadau-malu penumpang ona, tanba agora ne’e sira hadau-malu loos. Ha’u fó ezemplu, ita sa’e Bus husi Dili mai to’o Tunubibi, seidauk tun iha terminál konjak sira sa’e uluk karreta mai hadau ita-nia pasta. Nune’e mós husi Maliana ba Tunubibi, sira hadau-malu at’e ita-nia sasán bele lakon to’o ita diskute malú atu baku-malu sala-sala. Maibé, agora planu ida pasang ret realiza ne’e di’ak ona tanba kaereta para de’it, ita na’in mak ba sa’e,” nia hateten.
Notísia Relevante: DTT Bobonaro utiliza karreta privadu fasilita servisu Estadu nian iha terrenu
Jornalista : Sergio da Cruz
Editór : Cancio Ximenes
