DILI, 01 Abríl 2025 (TATOLI) – Ministériu Agrikultura, Pekuária, Peska no Floresta (MAPPF) prevee, iha tinan ne’e, rihun $80 ba konstrusaun ró ida hodi halo atividade peska.
Diretór-Jerál Peska, Acácio Guterres, hateten ba konstrusaun ró ne’e nia prosesu hein hela konkursu públiku iha Aprovizionamentu MAPPF nian hodi buka empreza manán-na’in atu konstrui tuir dezeñu ne’ebé ministériu rasik mak prepara.
“[Konstrusaun] ró ne’e nia objetivu atu ka’er ikan, la’ós atu kontrola peska ilegál”, Acácio Guterres informa ba Tatoli, ohin.
Tuir dirijente ne’e, bainhira konstrusaun ró ramata, iha faze dahuluk funsionáriu ka tékniku sira husi ministériu mak sei jere, hafoin entrega ba peskadór sira atu utiliza.
Lembra katak, tuir identifikasaun ne’ebé parte Autoridade Marítima Nasionál (AMN) halo liuhusi open source satellite, ró hamutuk unidade 17 maka halo movimentasaun iha tasi Timor-Leste hodi halo atividade peska ilegál durante 2023.
Prátika peska ilegál iha tasi Timór akontese tinan-tinan no atividade ida-ne’e fó prejuízu ba Estadu. Entre janeiru no dezembru 2023, país lakon ikan tonelada 1.020 neʼebé konverte ba osan hamutuk millaun $22.
Notísia relevante: Peska ilegál iha Timor-Leste implika ba ekonomia nasaun nian
Jornalista : Arminda Fonseca
Editora : Maria Auxiliadora
