Razaun tolu Governu halo alargamentu estrada husi Lesidere to’o Bekora

DILI, 01 Abril 2025 (TATOLI) – Ministériu Obra Públika (MOP) halo alargamentu estrada protokolu hahú husi Ponte B.J Habibie-Lesidere, Kuluhun to’o Bekora, bazeia ba razaun fundamentál tolu.

Ministru Obra Públika, Samuel Marçal, esplika razaun tolu ne’e mak projetu integradu ka projetu pilotu ida ne’ebé foin ba dahuluk Governu halo iha Timor-Leste mak planu ba Underground electrical cables, katak Governu hahú hakoi fiu eletrisidade sira iha rai-okos hodi fó espasu mamuk iha rai-leten no hadi’a imajen sidade nian.

“Agora fibra óptika seidauk mai tan Dili laran, fiu sabraut ona, satán aban bainrua fibra óptika to’o mai. Tanba ne’e mak ita-nia esforsu ida sei hakoi fiu sira ne’e ba rai-okos. Maski nasaun ki’ikoan, pelumenus iha dalan protokolu sira ita hakoi fiu sira ba rai-okos atu halo sidade ne’e bonita”, Samuel Marçal hateten liuhusi nota imprensa ne’ebé Tatoli asesu, ohin.

Razaun daruak, Governu loke estrada ho luan metru 24 ba sorin-sorin tanba agora uma ne’ebé komunidade sira konstrui iha estrada ibun ne’e semi permanente no nia kustu indemnizasaun ne’ebé ki’ik.

“Husi ne’e maka Governu sei kria kondisaun ba tinan 20 oin mai bainhira akontese engarrafamentu bele halo ona flying road ne’ebé fásil tebes no laiha problema, tanba espasu iha ona. Tanba ne’e maka planu halo alargamentu estrada metru 24 ne’e mai ho vizaun ida ne’ebé hateke ba dook”, ministru esplika.

Razaun ikus mak Governu hala’o alargamentu estrada tuir padraun urbanu, liuliu ba trosu nasionál ne’ebé tama iha Díli.

Iha sorin seluk, Xefe Planeamentu MOP, Tito Edgar, esplika mós katak tuir planu MOP nian ba alargamentu estrada ne’e iha típiku tolu mak halo estrada pista rua husi área Kuluhun nian to’o Estasaun Polísia Bekora ho luan metru 24.

Husi fali Estasaun Polísia Bekora bá iha Estádiu Futeból Bekora nian ho medida luan metru 24 no husi Estádiu Futeból bá to’o iha terminál Bekora ho luan metru 38, tanba kompleta kedan ho estasionamentu públiku.

“Hosi típiku tolu ne’e maka ita kria duni kondisaun ba aban-bainrua bainhira mosu engarrafamentu, ita bele halo Flying road tanba espasu iha ona”, esplika.

Nia afirma katak planu ne’e MOP implementa ho estudu kle’an husi enjeñeru sira ne’ebé halo ona kalkulasaun klara ba estudu viabilidade ka estudu transporte nian, tanba kada tinan transporte roda haat ne’ebé tama Timor-Leste liu unidade rihun 10.

Alargamentu estrada ne’e halo tanba reflete ba iha Planu Estratéjiku Dezenvolvimentu Nasionál (PEDN) 2011-2030, ne’ebé nu’udar matadalan ba dezenvolvimentu nasaun nian.

Notísia relevante : https://tatoli.tl/2025/03/12/alargamentu-estrada-kuluhun-bekora-ho-luan-metru-2374-no-naruk-kilometru-4/

Jornalista: Arminfda Fonseca

Editora: Maria Auxiliadora