Empreza VCB submete pedidu estensaun kontratu ba reabilitasaun terminál Bekora
DILI, 02 Abríl 2025 (TATOLI) – Empreza VCB ne’ebé halo reabilitasaun ba terminál Bekora aprezenta pedidu estensaun kontratu fulan rua tan hodi konklui obra ne’e, tanba foin atinje 80%.
Tékniku husi Empreza VCB Unipessoal Lda, Samuel Prego Lemos, hateten, tuir kontratu, projetu reabilitasaun ba terminál ne’e konklui iha 30 Marsu, maibé labele akontese tuir kontratu tanba sei falta 20% atu konklui.
Samuel esplika razaun labele finaliza tuir kontratu tanba dezafiu ne’ebé sira hasoru mak iha ajustamentu tékniku ho dezeñu. Nia salienta bainhira iha ajustamentu tékkniku, automatikamente liga ona ba planta no kadernu enkargu (BoQ, sigla portugés), tanba ne’e presiza koordena didi’ak molok implementa.
Dezafiu seluk mak iha férias natál no tinan foun, kuaze semana rua laiha atividade iha Dezembru 2024 no udan ne’ebé tau iha Janeiru 2025 laran lapara.
“Buat sira ne’e hotu halo produtividade serbisu loron ida nian la másimu, nune’e to’o 30 Marsu foin atinje de’it 80% no falta 20% atu konklui iha Abríl la’e Maiu. Tanba falta 20% ne’e hela de’it pavimentu, pinta zebra cross, pinta parajen no ikus liu pinta pot bunga”, Samuel Lemos dehan ba TATOLI, ohin.
Iha sorin seluk, Xefe Departamentu Sekretariadu Apoiu Tékniku Administrasaun iha Diresaun Nasionál Transporte Terrestre (DNTT), Nelson Sequeira Martins, hateten konstrusaun terminál nian daudaun Governu foka uluk ba parte leste nian hodi halo reabilitasaun, liuliu terminál Bekora tanba ida-ne’e akomoda transporte públiku sira husi Lautein, Manatutu, Baukau no Vikeke.
Ba termimál ba parte súl, tuir planu, atu halo iha Manleuana no ida-ne’e sei akomoda transporte públiku husi Kovalima, Aileu, Ainaru no Manufahi. Terminál ba oesta ka loromonu nian atu halo iha Tasi Tolu no ida-ne’e sei akomoda transporte husi Ermera, Likisá, Bobonaru, inklui travel sira ne’ebé bá-mai Dili-Atambua.
“Terminál ba parte súl no oeste nian seidauk bele halo tanba ida-ne’e tama hotu Planu Mestre Transporte Públiku Timor-Leste ne’ebé prosesu Detail Engineering Design daudaun iha ona Ajénsia Dezenvolvimentu Nasionál halo estudu, ne’ebé seidauk bele halo konstrusaun iha tinan ne’e”, Nelson esplika.
Lembra katak, iha Dezembru 2024, Ministériu Transporte no Komunikasaun asina kontratu ho empreza VCB Unipessoal Lda, halo reabilitasaun ba terminál Kamea-Bekora ho totál orsamentu $77.415,85.
Notísia relevante: MTK kontrata empreza VCB reabilita terminál pasajeiru iha Becora
Jornalista: Arminda Fonseca
Editora: Maria Auxiliadora
