DILI, 20 Janeiru 2025 (TATOLI) – Ministériu Transporte no Komunikasaun (MTK) kontrata, iha 2024, empreza VCB hodi halo reabilitasaun ba terminál pasajeiru iha Camea-Becora, informa Diretór Nasionál Aprovizionamentu MTK, Pascoal Couto de Jesus.
Nia dehan, tuir loloos, reabilitasaun ba terminál ne’e halo ona iha tinan kotuk, maibé planta no kadernu enkargu (BoQ, sigla portugés) ne’e Ajénsia Dezenvolvimentu Nasionál (ADN) tenke verifika lai mak foin loke konkursu públiku, tanba ne’e demora to’o 2025.
“Iha Dezembru 2024, ita kontrata ona kompañia VCB Unipessoal, Lda., halo reabilitasaun ba terminál Camea-Becora. Daudaun serbisu la’o hela, ita bele dehan atinje ona 30%. Tuir planu sei ramata iha Abríl 2025”, Pascoal de Jesus adianta iha Caicoli, ohin.
Orsamentu ne’ebé MTK prevee ba reabilitasaun hamutuk rihun $130, maibé depoizde ADN halo verifikasaun hatún ba $77.415,85.
Notísia relevante : https://tatoli.tl/2024/09/03/ministeriu-responsavel-halo-hela-prosesu-aprovizionamentu-ba-reabilitasaun-terminal-becora/
Projetu reabilitasaun terminál pasanjeiru iha Camea ne’e parte ida atu atinje meta balun iha tinan 2024 nian husi área prioridade sira liga ba medida husi programa Governu nian, liuhusi Diresaun Nasional Transporte Terrestre (DNTT) hodi dezenvolve Infraestrutura Transporte Terrestre Públiku no Privadu, inklui sinalizasaun rodoviária.
Samuel Prego Lemos, tékniku husi empreza VCB, hatete prosesu reabilitasaun la’o ona, tanba kontratu asina tiha ona, nune’e iha 10 Dezembru halo kedas eskavasaun ba área sira ne’ebé sei monta pavimentu, ezgotu no muru protesaun.
“Inísiu Janeiru ita hahú fali serbisu konstrusaun ba muru protesaun no konklui ona iha 15 Janeiru 2025. Tuir kontratu, projetu ne’e sei termina iha 30 Marsu”, informa.
Nia garante katak bainhira laiha impedementu husi natureza no komunidade apoia maka empreza sei finaliza projetu ne’e tuir kontratu.
“Difikuldade hanesan ita hatenek katak terminál fatin ida ne’ebé konsentrasaun ba transporte públiku husi munisípiu Manatuto, Baucau, Lautém no Viqueque aumenta ho mikrolete Hera no Metinaro, nune’e terminál ne’e rame tebes no dalaruma difikulta uitoan serbisu iha terrenu. Maibé, ami-nia koordenasaun di’ak ho parte DNTT destakadu iha terminál, tanba ajuda tebes ami atu jere movimentu karreta sira”, dehan.
Rekorde katak Prezidente Komisaun E Parlamentu Nasionál ne’ebé trata Asuntu Infraestrutura, Marcos Soares, antes ne’e, husu Ministériu Transporte Komunikasaun atu halo reabilitasaun ba terminál Camea-Becora iha tinan ne’e.
“Fiar katak, iha 2025, MTK halo terminál sira ne’e, oinsá fasilita transporte públiku”, nia hateten ba jornalista sira foin lalais ne’e.
Orsamentu Jerál Estadu 2025 ba MTK hamutuk millaun $13,3, ne’e aloka ba saláriu vensimentu $4,659.105, bens no servisu $6,336.053, transferénsia públika $1,811.500, kapitál menór rihun $250, kapitál no dezenvolvimentu $296,870.
Husi montante ne’e finansia programa transporte ho subprograma jere integrasaun seguransa no dezenvolvimentu rejionál ba transporte terrestre ho atividade haat, subprograma infraestrutura no transporte terrestre ho atividade neen, subprograma jere serbisu atendimentu públiku no munisípiu ho atividade ida, subprograma transporte marítima ho atividade lima.
Notísia relevante: Komisaun E husu MTK reabilita terminál Becora iha 2025
Jornalista: Arminda Fonseca
Editora: Maria Auxiliadora