DILI, 03 setembru 2024 (TATOLI)—Ministériu Transporte no Komunikasaun (MTK) halo ona prosesu aprovizionamentu ba reabilitasaun terminál Becora.
“Prosesu reabilitasaun ba terminál Becora nia prosesu iha aprovizionamentu, ita hein de’it rezultadu. Espera depois vizita Amu Papa bele hahú ona reabilitasaun. Reabilitasaun terminál ne’e ho kustu $160.000,” Xefe Departamentu Sekretariadu Apoiu Tékniku Administrasaun husi Diresaun Nasionál Transporte Terrestre (DNTT), Nelson Sequeira Martins, informa ba Agência Tatoli, iha ninia knaar fatin, DNTT, Balide, tersa ne’e.
Ekipa konjunta lidera husi Sekretaria Estadu Asuntu Toponímia no Organizasaun Urbana (SEATOU) bazeia ba karta ne’ebé fó sai husi MTK liuhusi DNTT, halo despeju administrativu, iha loron 24 abríl 2024, ba uma-kain 19 hahú husi mini merkadu besik morru Prizaun Becora, dalan ba mota-ulun to’o terminál Becora.
Notisia relevante : Ekipa SEATOU halo tan despeju ba uma-kain 19 iha Becora
DNTT rekola reseita $3.139.014,50 iha janeiru to’o 30 jullu 2024 husi atividade rejistu veíkulu, inspesaun veíkulu no seluk tan.
“Husi reseita ne’ebé DNTT rekolla to’o dezembru ne’e boot liu tan númeru agora, tanba agora de’it millaun $3-resin, boot liu fali orsamentu ne’ebé prevee ba DNTT iha tinan 2024 hamutuk $2.839.453,” nia tenik.
Jornalista : Arminda Fonseca
Editora : Julia Chatarina
