KOVALIMA, 02 Abríl 2025 (TATOLI) – Autoridade Nasionál no Petróleu (ANP) identifika katak folin kombustível iha munisípiu Kovalima aas liu kompara ho munisípiu Baukau no munisípiu ne’ebé besik iha Dili.
Jerente Jerál Administrasaun Lisensiamentu no Operasaun downstream, Juvencia Costa dehan, ANP identifika aas bazea ba rezultadu rekolla informasaun diária hosi ANP ho diária iha postu abastesimentu kombustível sira.
“Atu fahe informasaun katak hahú 2012 ANP rekolla informasaun folin kombustível diária husi postu abastesimentu kombustível (PAK) ne’ebé opera iha munisípiu hotu ho objetivu ita atu hatene folin diária kombustível iha munisípiu ne’ebé ami identifika katak folin kombustível gazolina no gazoel iha munisípiu Kovalima aas”, Juvencia Costa informa ba TATOLI, liuhusi entrevista, iha salaun AMC, horseik.
ANP nia knaar mak atu estrabelese no regulariza folin kombustível, tanba ne’e ANP sempre rekolla informasaun diária folin kombustível husi postu abastesimentu kombustível (PAK) iha munisípiu hotu.
“ANP iha kna’ar atu estabelese no regula folin kombustível ida-ne’e parte ida husi ANP , ita bele komprende di’ak ita nia folin kombustível iha ita-nia munisípiu ne’e oinsa” nia informa
ANP rekolla informasaun folin kombustível hahú iha 2012 ne’ebé iha momentu Governu atribui subsídiu ba transportasaun públiku no dadaun ne’e mós sei kontinua tanba ANP nia programa hakarak regulariza folin kombustível.
“Ita identifika folin kombustível tantu husi Vikeke, Manufahi, Baukau no munisípiu Kovalima mós folin kombustível karun kompara ho munisípiu sira seluk Baukau no munisípiu ne’ebe besik Dili”, nia dehan
Komparasaun haree iha lista ne’e: Presu Gasoline no Gasoleo iha Postu Abastesimentu Kombustivel_ 1 Jan – 15 Fev 2025 (1) Presu Gasoline no Gasoleo iha Postu Abastesimentu Kombustivel_ 1 Jan – 15 Fev 2025
Folin kombustível aas, haree ba fatór distánsia sai hanesan determina folin kombustível karun ho nune’e ANP tenta haree hela, maibé bazeia dadus Kovalima aas kompara ho munisípiu sira seluk.
Diretór Ajénsia Munisipal no Planeamentu, Afonso Nugueira Nahak, husu ANP atu kontrola folin postu abastesimentu kombustível iha munisípiu Kovalima, tanba postu abastesimentu ne’ebé estabelese husi Timor GAP nia folin kombustível nafatin aas la hetan mudansa ruma.
Jornalista: Celestina Teles
Editór: Rafael Ximenes de A.Belo
