DILI, 02 Abríl 2025 (TATOLI) – Primeiru-Ministru, Xanana Gusmão, aprezenta projetu rezolusaun Governu kona-ba modelu Administrasaun Espesiál Rejiaun Administrativa Espesiál Oekusi Ambenu (RAEOA) no hetan ona aprovasaun.
Dokumetu husi Governu haktuir, objetivu husi rezolusaun ida-ne’e mak atu organiza, liuhusi konsulta ho populasaun lokál enklave Oekusi Ambenu, modelu foun ba administrasaun autoridade rejiaun nian, nune’e mós modelu zona ekonomia espesiál, ne’ebé tuir konstituisaun prevee ba rejiaun ne’e.
“Iha mós hanoin atu konsulta ho dirijente administrativu, autoridade lokál no sosiedade Oekusi Ambenu nian atu hili no dezigna entre sira, kona-ba sé maka sei bele ezerse mandatu administrativu sira rejiaun nian, iha autoridade no iha zona ekonómika espesiál”, nota ne’e dehan.
Lembra katak, iha loron 18 Fevereiru, Primeiru-Ministru, Xanana Gusmão, hala’o vizita ofisiál bá RAEOA, no relata katak sei prepara komisaun atu define estrutura no funsaun loloos husi Prezidente Autoridade RAEOA, nomós Komisaun Ezekutiva Zona Ekonómiku Espesiál Dezenvolvimentu Oekusi Ambeno (ZEEDOA) nian.
“Ha’u rasik mai iha ne’e, atu diskute ho imi hodi aprova loloos estrutura RAEOA. Atu define loloos Prezidente Autoridade no Koordenador ZEEDOA nia funsaun sira. Tanba agora RAEOA ho ZEESM iha ha’u-nia okos, nune’e ha’u mai iha ne’e atubele hatudu ba ferik no katuas sira, katak uluk imi-nia mehi, ami sei ka’er metin atu hala’o iha Oekusi. Tanba RAEOA iha nia estatutu espesial ida la hasses aan husi regra, lei, norma, ne’ebé funsiona iha ita-nia Governu no administrasaun publika”, Xanana dehan.
Xefe Governu mós fó hanoin ba Prezidente Autoridade hodi haree liuliu ba administrasaun ho buat sira-neʼebé atividade ba kada tinan atu define iha nia estrutura klaru. Nune’e mós ba Koordenadór ZEEDOA nian atu haree liu kona-ba Oekusi tomak, iha ne’ebé aprezenta poténsiál hodi esplora, nune’e ekonomia bele la’o ba oin no benefisia ba povu.
Notísia relevante: https://tatoli.tl/2025/02/18/governu-sei-define-loos-estrutura-no-funsaun-autoridade-raeoa-zeedoa/
Jornalista: Arminda Fonseca
Editora: Maria Auxiliadora
