OEKUSI, 18 Fevereiru 2025 (TATOLI) – Governu liuhusi Primeiru-Ministru, Kay Rala Xanana Gusmão, relata sei prepara komisaun atu define estrutura no funsaun loloos husi Prezidente Autoridade Rejiaun Administrativa Espesiál Oekusi Ambeno (RAEOA) no mós Komisaun Ezekutiva Zona Ekonómiku Espesiál Dezenvolvimentu Oekusi Ambeno (ZEEDOA) nian.
“Ha’u rasik mai iha ne’e, atu deskute ho imi hodi aprova loloos estrutura RAEOA atu define loloos Prezidente Autoridade nia funsaun sira no Koordenadór ZEEDOA nia funsaun sira. Tanba agora RAEOA ho ZEESM iha ha’u-nia okos, nune’e ha’u mai iha ne’e atubele hatudu ba ferik no katuas sira, katak uluk imi-nia mehi, ami sei ka’er metin, atu hala’o iha Oekusi la’o ho kapa’as. Tanba RAEOA iha nia estatutu espesiál ida la hases aan husi regra, lei, norma, nune’e funsiona ona iha ita-nia Governu no administrasaun públika,” Xanana dehan iha Otél Ambeno, ohin.
Primeiru-Ministru hato’o asuntu ne’e iha enkontru loron daruak ho ofisiál, funsionáriu sira iha Rejiaun Administrativa Espesiál Oekusi Ambenu .
Notísia relevante:PM Xanana propoin ba ZEEDOA implementa polítika TIA
Xefe Governu mós fó hanoin ba Prezidente Autoridade hodi haree liuliu ba administrasaun ho buat sira-ne’ebé atividade ba kada tinan-nian atu define iha nia estrutura klaru. Nune’e mós ba Koordenadór ZEEDOA nian, atu haree liu kona-ba Oekusi tomak, iha ne’ebé mak aprezenta poténsiál hodi esplora, nune’e ekonómia bele la’o ba oin no benefisia ba povu.
“Ne’ebé iha buat barak, ita sei deskute tan, iha arte no kultura sosiál no seluk tan, maibé ita atu hadi’a de’it estrutura, nune’e imi na’in-rua (Rogério ho João Gonçalves), imi tenke deskuti ho imi-nia ekipa, tuur hamutuk deskute, loke aan ba malu, só loke-an ba malu mak bele iha kbi’it atu hakat ba oin ho di’ak, ida ne’e mak ha’u husu ba imi na’in-rua nu’udar responsabél másimu iha Oekusi,” nia apela.
Hatu’ur loloos saláriu ba asesór sira
Biban ne’e, Xefe Governu mós propoin presiza rezolve problema internu sira no hatu’ur loloos saláriu ba asesór sira, molok aprezenta planu estrutura ne’e.
“Ha’u rona asesór sira la halo buat ida, maibe nia ba saláriu sira wow. Problema internu imi tenke deskuti ko’alia ba malu, nune’e semena oin mai ita bele aprova ona estrutura ne’e, la’ós provizória hela de’it, atu 2025 ita la’o hahú husi Marsu, ha’u hatene problema sei barak tebes, Prezidente Autoridade tenke book buat ruma ona, tinan ida-ne’e to’o ita aprova tiha estrutura ne’ebé bele dehan katak iha kooperasaun hodi define didi’ak, mak buat hotu sei klaru, tanba agora ZEEDOA nia orsamentu ne’e iha hela dotasaun Governu iha ha’u-nia kontrolu,” nia afirma.
Notísia relevante:PM Xanana husu Autoridade RAEOA-ZEEDOA promove koordenasaun serbisu iha administrasaun públika
Tuir ajenda ne’ebé Ajénsia Tatoli, I.P, asesu iha loron kuarta, 19 Fevereiru 2025, Primeiru-Ministru sei hala’o vizita ba projetu estrada iha suku Taiboko sub-rejiaun Pante Makasar no kontinua ba sub-rejiaun Nítibe suku Usitako to’o suku Bene-Ufe aldeia Lamasin no Nefolete.
Iha loron kinta, 20 Fevereiru 2025, Primeiru-Ministru sei hala’o fali vizita ba projetu estrada iha sub-rejiaun Oésilo, estrada husi Tono ba Oésilo no kontinua ba sub-rejiaun Pássabe, depois kontinua fali ba estrada sira iha Tumin, Hau-Ana, Ponte-Bitopa, kontinua ba ponte foun Oébaha.
Nune’e, iha loron sesta 21 Fevereiru 2025, parte dadeersan Primeiru-Ministru sei hala’o observasaun ba funsionamentu barrajén Tono no kontinua vizita ba rezidénsia Fulolo, no kontinua hala’o vizita ba aeroportu Rota do Sândallo, no iha lorokraik Xefe Governu sei viajén fila-fali ba Dili ho aviun Aero Dili.
Notísia relevante:PM Xanana: Oekusi-oan presiza prepara aan hodi simu podér lokál no desentralizasaun administrativa
Jornalista: Abílio Elo Nini
Editór: Florencio Miranda Ximenes
