DILI, 02 Abríl 2025 (TATOLI) – Konsellu Ministru aprova, ohin, projetu dekretu-lei kona-ba uzu autorizasaun lejizlativa ne’ebé hetan husi lei númeru 7/2024, hodi halo alterasaun daruak ba lei númeru 8/2004, ne’ebé aprova Estatutu Funsaun Públika (FP).
Tuir dokumentu husi Governu, diploma ida-ne’e estabelese limite tinan 65 nu’udar idade obrigatóriu hodi remata relasaun traballu funsionáriu públiku no ajente administrasaun públika nian, ne’ebé sei akontese automatikamente iha loron ne’ebé traballadór atinje idade refere.
Nota ne’e salienta katak medida ida-ne’e hakarak atu promove joven sira ba kuadru administrasaun públika nian, garante renovasaun jerasionál no hadi’a kualidade no efisiénsia servisu ne’ebé presta ba populasaun.
Diploma ne’e determina mós katak Komisaun Funsaun Públika tenke notifika traballadór, ninia entidade empregadora no Seguransa Sosiál pelumenus loron 90 molok hakotu funsaun.
“Iha situasaun sira ba interese públiku ne’ebé fundamenta ho loloos, no bainhira labele substitui imediata traballadór ne’e, sei posivel atu prolonga hodi hala’o funsaun, tuir akordu hamutuk, to’o tinan 68”, adianta.
Diploma ne’e sei vigora iha loron 1 fulan-Janeiru tinan 2026.
Notísia relevante : https://tatoli.tl/2024/10/08/pn-aprova-proposta-lei-reforma-obrigatoriu-ba-fp-ho-idade-65/
Jornalista: Arminda Fonseca
Editora: Maria Auxiliadora
