VIKEKE, 02 Abríl 2025 (TATOLI)—Koordenadór Estensionista postu Uatulari, Francisco Tilman Belo, informa iha tinan 2025 ne’e Ministériu Agrikultura, Pekuária, Peska no Floresta (MAPPF) apoia povu agrikultór tetu ka loke natar foun hamutuk ektare 156 ne’ebé abandona tinan naruk.
Notísia Relevante: MAPPF destaka ekipamentu pezadu halo limpeza natar ektare 120 iha Uatulari
“Iha tinan ida-ne’e ministériu apoia ekipamentu pezadu halo normaliza ba irrigasaun fatin haat ne’ebé agora bee asesu hotu ona natar totál hamutuk ektare 156. Husi natar sira-ne’e durante tinan naruk abandona tanba kauza husi irrigasaun aat, ne’ebé irrigasaun sira-ne’e kee di’ak ona distribui ona bee ba natar, atu agrikultór sira halo fila-fali sira-nia natar,” Francisco Tilman Belo hateten Agência Tatoli iha postu Uatulari, ohin.
Aleinde ne’e, nia dehan, MAPPF mós apoia tratór boot tetu kabubu tanba natar sira-ne’e abandona tinan naruk ne’ebé kabubu laiha tiha hotu.
“Natar sira-ne’e, ita apoia tratór boot hodi tetu kabubu natar husi fatin haat, ba fatin tolu mak kabubu tetu ona, hela natar Betor ne’ebé mak tratór tetu ona maibé seidauk ramata. Ohin, tratór boot fila ona ba munisípiu hodi halo manutensaun, depois manutensaun hotu sei fila mai hodi kontinua tetu kabubu parte Betor nian,” nia dehan.
Nune’e, nia dehan, bainhira tetu kabu ramata ona mak MAPPF sei distribui fini hare ba agrikultór sira hodi kari ba natar foun sira-ne’e.
“Tuir planu, ami sei distribui fini hare ba ita-nia agrikultór sira kada ektare ida, ita sei fó fini hare kilograma 10, ne’ebé sei fahe hotu ba ektare 165 hodi agrikultór sira kuda ba iha natar foun sira. Maibé, ita hein tetu kabubu hotu tiha mak foin distribui. Kona-ba dadus benifísiáriu ba natar hirak ne’e ami seidauk konta, ami loro-loron akompaña tratór boot hodi ba tetu kabubu natar nian,” nia hateten.
Nia iha esperansa katak, husi natar foun ne’ebé tetu ka loke tiha ona ne’e espera katak tinan 2025 bele hasa’e produsaun hare iha postu Uatulari.
Tuir dadús, loke natar foun sira-ne’e kompostu husi natar Betor hamutuk ektare 80, natar Iraler ektare neen (6), natar Luruboru hamutuk ektare 62 no natar Lakutole ektare ualu (8).
Enkuantu, natar hirak ne’e pertense iha suku rua suku Matahoi, Makadike Uaitame no Makadike de Baixo.
Jornalista : Vitorino Lopes da Costa
Editór : Cancio Ximenes
