KOVALIMA, 02 Abríl 2025 (TATOLI)–Programa Nasionál Dezenvolvimentu Suku (PNDS) munisípiu Kovalima, partilla esperénsia Manuál operasaun programa (MOP) ba nia funsionáriu sira iha munisípiu no fasilitadór postu administrativu hitu.
“Formasaun ida-ne’e hanesan parte ida atu fó hanoin nafatin ba funsionáriu sira ida-idak nia knaar ne’ebé hala’o iha kada postu administrativu sira matadalan PNDS hanesan Manuál operasaun programa (MOP), kona-ba sosiál oinsá mak bele fasilita komunidade hala’o enkontru”, Diretór PNDS Kovalima, Pedro de Araújo Gomes, informa ba jornalista sira iha salaun AMC, ohin.
Dirijente ne’e dehan, área finansa liga ba jestaun finanseira ko’alia subsídiu ne’ebé mak mai iha PNDS ne’ebé fahe ba subsídiu infraestrutura operasionál no subsídiu depende ba rekezitu distánsia husi munisípiu ho totál populasaun bazeia ba SENSU fó fila 2022 no aprovizionamentu ba komunidade.
Formasaun ida-ne’e foku liu ba funsionáriu ne’ebé mak hanesan funsionáriu PNDS iha munisípiu no postu administrativu, fasilitadór finansa, sosiál no tékniku sira iha Kovalima.
Fasilita formasaun atu nune’e bele hatene lala’ok implementasaun no kna’ar parte finansa atu halo saida maske sira hatene ona. Maibé, bazeia ba iha mudansa, hafoin alterasaun lei númeru 8/2013 halo ona altersaun ba da-neen dekretu –lei númeru 4/2025 iha mudansa matadalan balun.
Ho formasaun ida-ne’e oinsá atu fó hanoin ba funsionáriu ida iha ida-idak nia serbisu hodi la’o tuir matadalan implementasaun Programa Nasionál Dezenvolvimentu Suku (PNDS) hahú husi munisípiu, postu administrativu no to’o ba suku no aldeia sira.
Mudansa matadalan maka hanesan iha matadalan anteriór iha Uma Naroman ba Povu (UNP) maibé daudaun ne’e la iha UNP, aprovizionamentu iha ajudikasaun direta ho rejistasaun kuatasaun.
Tuir Matadalan anteriór halo ajudikasaun orsamentu ho valór orsamentu rihun tolu mai karaik, maibé valór orsamentu rihun tolu ba leten rejistasaun kuatasaun.
Iha sorin seluk, Partisipante Vitorino da Costa reforsa katak funsionáriu PNDS postu sira presiza tuir formasaun atu implementa programa PNDS ne’ebé implementa iha munisípiu Kovalima.
“Ami tuir formasaun durante loron rua importante loos. Liuhusi formasaun ida-ne’e bele aumenta ami-nia koñesementu kona-ba implementasaun Programa Nasionál dezenvolvimentu Suku (PNDS) to’o iha postu administrativu sira”, nia dehan.
Jornalista: Celestina Teles
Editór: Rafael Ximenes de A. Belo
