DILI, 03 Abríl 2025 (TATOLI) – Empreza Vorakai Unipessoal Lda sai nu’udar retallista (resellers) ka revendedór ofisiál Starlink nian ba servisu internét satélite revolusionáriu SpaceX hodi hadi’a konetividade dijitál iha Timor-Leste.
Diretora Vorakai Unipessoal Lda, Tammy Kassiou, hateten empreza sei fornese internét ho velosidade aas ho klase mundiál diretamente ba ajénsia Governu nian, negósiu sira no organizasaun sira iha nasaun ne’e, ho foku maka’as ba transformasaun kapasidade ekonómika no apoiu mós intenét ba komunidade ne’ebé iha área rurál durante la hetan atendimentu ba internét.
“Ami sente onradu atu serbisu hamutuk ho Starlink no SpaceX sai hanesan ponte ba lakuna dijitál iha Timor-Leste. Ida-ne’e hanesan pasu boot ida ba ami-nia misaun hodi fornese teknolojia ne’ebé lais, konfiavel no fásil asesu ne’ebé sei dudu progresu ba nasaun tomak”, Tammy Kassiou hateten liuhusi nota imprensa ne’ebé Tatoli asesu, ohin.
Kassiou salienta katak Timor-Leste luta durante tinan barak ona ho kobertura internét ne’ebé ladún di’ak, liuliu sai husi kapitál, infraestrutura ne’ebé limitadu, kustu aas, no servisu sira ne’ebé la konsistente halo falla ba objetivu sira no serbisu di’ak sira husi setór sira hanesan edukasaun, kuidadu saúde, negósiu no seluk tan.
Prezensa Starlink iha Timor-Leste liuhusi empreza Vorakai ida-ne’e marka mudansa transformasaun ida ba nasaun ne’e, hodi aproveita konstelasaun ida husi satélite sira Low Earth Orbit (LEO), Starlink oferese servisu internét ne’ebé lalais, estavel, no eskalavel ne’ebé ultrapasa dezafiu sira infraestrutura tradisionál nian.
“Internét ne’ebé lalais no konfiavel la’ós ona luxu ida, maibé infraestrutura esensiál. Internét permite Governu atu fornese servisu sira ho efisiente, negósiu sira atu funsiona ho kompetitivu, estudante sira atu asesu ba aprendizajen dijitál, no sosiedade atu ligadu nafatin. Ida-ne’e maka oinsá ita aselera dezenvolvimentu no harii ekonomia dijitál ida ne’ebé inkluzivu no buras”, nia esplika.
Tuir nia, arranju Internet Service Provider (ISP) foun ho Starlink sei apoia prominénsia no kapasidade ekonómika Timor-Leste nian ne’ebé aumenta, tanba nia koloka nia-aan nu’udar nasaun ida ne’ebé iha ligasaun, haree ba oin no prontu atu tama dijitál no sai hanesan sentru manufatura globál boot ida.
“Ho Starlink, ami la’ós de’it liga intrenét ba ajénsia Governu nian, eskola sira, saúde, operasaun komersiál sira no negósiu sira, maibé ami kria (fondasi) ba oportunidade ekonómika, inovasaun no progresu sosiál”, Kassiou realsa.
Empreza ne’e sei fornese hardware Starlink no pakote subskrisaun ne’ebé dezeña espesifikamente ba merkadu Timor-Leste. Servisu ne’e sei foka ba fornese pakote fleksivel oioin ne’ebé kobre hardware, instalasaun no apoiu hodi garante katak servisu no indústria krítiku sira bele hetan benefísiu lalais husi teknolojia ne’ebé halo mudansa ba buat hotu.
“Ami-nia objetivu mak fornese konetividade ho velosidade aas ne’ebé adapta ba nesesidade loloos iha Timor-Leste. Hanesan empreza lokál, ami kompreende dezafiu sira no ami sente orgullu hodi oferese solusaun sira ne’ebé hakbiit duni nasaun no sosiedade ne’ebé presiza”, nia hatutan.
Lembra katak, iha loron 13 Marsu 2025, Vorakai hamutuk ho empreza Chiliasa hetan serfikadu rejistu ba Provedór Servisu Internét rua husi Autoridade Nasionál Komunikasaun (ANC,sigla portugés) hodi hala’o atividade iha setór telekomunikasaun iha Timor-Leste.
Iha loron 05 Dezembru 2024, ANC fó lisensa jerál ba utilizasaun espektru rádiofrekuénsia ba Starlink hodi permite empreza ne’e hahú komersializasaun ninia servisu internét iha país ne’e.
Starlink ne’ebé halo operasaun husi SpaceX, utiliza konstelasaun satélite ho órbita ki’ik (LEO, low-earth-orbit) hodi fornese internét ho velosidade aas. Modelu ida-ne’e efetivu tebes iha rejiaun sira ne’ebé asesu limitadu, karun ka laiha asesu ba infrastrutura.
Notísia relevante: Starlink tenke estabelese nia reprezentasaun iha Timor-Leste
Jornalista: Arminda Fonseca
Editora: Maria Auxiliadora
