DILI, 13 Marsu 2025 (TATOLI) – Prezidente Autoridade Nasionál Komunikasaun (ANC, sigla portugés), Flávio Cardoso Neves, husu ba empreza Starlink tenke estabelese sira-nia reprezentasaun iha Timor-Letse.
“Diskusaun ida entre Autoridadae Nasionál Komunikasaun no Starlink atu estabelese sira-nia reprezentante tékniku ida iha ne’e. Kuandu ita halo negósiu ne’e, tenke rejistu iha Servisu Rejistu no Verifikasaun Emprezariál”, Flávio Cardoso Neves hateten iha salaun ANC, Kaikoli, ohin.
Nia esplika katak Starlink presiza kria nia eskritóriu iha Timor-Leste, nune’e iha futuru bainhira ema sira hola sira-nia server mak hetan problema bele bá konfirma diretamente hodi hetan resposta.
Dirijente ne’e salienta katak, antes ne’e, ema sosa Starlink husi Indonézia, Austrália no Singapura, maibé iha ne’ebá sira aplika ona roaming ba sira-nia ekipamentu no bele uza iha Timor-Leste to’o de’it loron 60. Depoizde liu loron ne’e sei lafunsiona. “Entaun, ema hotu ne’ebé sosa ne’e, mai fali iha ANC. Ida-ne’e ANC labele rezolve, tanba ANC garante de’it oinsá buka mekanizmu ba ekipamentu sira ne’ebé tama iha Timor-Leste bele hetan kontrolu”, dehan.
Iha sorin seluk, Flávio Cardoso mós lamenta ho empreza Ceslink ne’ebé sira atribui ona sertifikadu lisensa, iha tinan kotuk, maibé to’o agora funsionamentu la la’o.
“Operadór telekomunikasaun daudaun iha Timór ne’e haat, Timor Telecom, Telkomcel, Telemor inklui Ceslink, tanba Ceslink legalmente hetan ona sertifikadu rejistu husi Governu, liuliu ANC”, Flávio Cardoso relata.
Tanba Ceslink mós tuir ona prosesu balun iha tempu naruk hodi kompleta rekizitu sira ba lisensa rejistu no agora tenke hetan lisensa espektru, tanba sertifikadu rejistu la garante sira atu hala’o operasaun.
Notísia relevante: Governu atribui sertifikadu ISP ba empreza tolu
“Espektru frekuénsia rádiu ne’e ANC limitadu. Ita-nia papél ida mak atu aloka frekuénsia ne’e tuir nesesidade ne’ebé sira presiza, maibé agora sira-nia nesesidade frekuénsia ne’ebé sira atu uza halo operasaun ba sira-nia atividade ne’e ida ne’ebé? Até agora sira la mai”, nia preokupa.
Notísia relevante: CESLINK seidauk konsege halo operasaun maski rejistadu iha tinan-tolu liubá
Tuir regulamentu, sertifikadu lisensa ne’ebé hetan iha data limitasaun, iha durasaun tinan tolu, tenke hala’o ona atividade, maibé durante tinan tolu laiha atividade ruma, autoridade reguladora halo fali revizaun hodi foti fali sertifikadu lisensa ne’e.
Notísia relevante: ANC atribui sertifikadu rejistu ba ISP Vorakai no Chiliasa
Jornalista: Arminda Fonseca
Editora: Maria Auxiliadora
