DILI, 03 Abríl 2025 (TATOLI)—Ministru Justisa, Sergio Hornai defende atu halo reforma justisa ne’ebé hasa’e kualidade no koñesimentu pesoál.
“Ita presiza mellora liután, hotu-hotu tenke halo reflesaun para justisa ida kualidade, reforma la’ós atu hasai no hatama ema, maibé ita presiza reforma hasa’e kualidade no koñesimentu,” Ministériu Justisa, Sergio Hornai, hateten hafoin halo audiénsia ho Komisaun A ne’ebé trata trata asuntu Justisa no Konstitusionál, iha Parlamentu Nasionál (PN), kinta ne’e.
Nia dehan, formasaun pesoál hodi autór judisiáriu bele kuidadu iha termu investigasaun no akuzasaun ba kazu sira nune’e bele fó justisa ho objetividade, imparsiál, no indepedente hodi hatuur justisa ho loloos.
“Atu implementa planu roadmap ne’ebé iha ona, ita-nia planu estratéjiku ba setór justisa no polítika reforma justisa ba prosesu sira ne’e daudaun la’o hela iha kurtu, médiu no longu prazu,” nia akresenta.
Notísia relevante : Bankada CNRT husu Governu reforsa reforma justisa
Kondisaun ne’e hodi bele prepara rekursu umanu no hametin autór judisiáriu ni akoñesimentu, tanba ne’e iha formasaun matéria komplementár no espesializadu, mellora ekipamentu inklui infraestrutura no lejizlasaun.
Governante ne’e toka mós ba asidente ne’ebé akontese iha semana hirak liubá bele fó reflesaun, nune’e autór judisiáriu sira iha obrigasaun atu halo kampaña ka diseminasaun.
“Hodi hateten ita-nia joven sira ne’ebé sei minoridade labele uza, se lae tanba inan-aman no ita rasik mós konsiente uza motorizada konforme hakarak,’’ nia tenik.
Ministru hatutan, presiza halo prevensaun no intensifika edukasaun kódigu estrada atubele konsiensializa informasaun nune’e bainhira uza viatura tenke ho kuidadu iha estrada públiku.
Jornalista : Nelson de Sousa
Editora : Julia Chatarina
