DILI, 03 Abríl 2025 (TATOLI)—Prokuradoria Jerál Repúblika (PJR) sei hatún despaisu relasiona ho desizaun ne’ebé Prokuradora Benvinda do Rosário foti ba kazu matebian Zizelma Maria de Fatima Verdial Gonçalves.
Iha loron 13 Marsu 2025, motorista ida kondús motorizada ho velosidade a’as, xoke Zizelma ne’ebé hakat hela zebra cross iha loja funan Buras, Delta, nia oin, hodi rezulta Zizelma lakon vida iha Hospital Nacional Guido Valadares (HNGV).
“Prokuradoria Jerál Repúblika hatudu sentidu kondolénsia forte tebes ba família ein lutada, ita hotu lakon alin ida no lamentável. Ita sente lakon ema ida hanesan alin-feto ne’e, Prokuradoria Jerál Repúblika nia pozisaun depois hetan koñesimentu prosesu desizaun ida-ne’e, daudaun prepara ona, lorokraik sei hatún despaisu, ita ho despaisu ida-ne’e sei halo buat ruma,” Prokuradór Jerál Repúblika, Alfonso Lopes, hateten iha resintu Parlamentu Nasionál (PN), kinta ne’e.
Notísia relevante : Ministru Justisa defende reforma justisa ne’ebé hasa’e kualidade no koñesimentu pesoál
Antes ne’e, Juíz José Gonçalves hatún desizaun ba arguidu ho pena prizaun tinan 3 no suspensaun ba tinan 4, nune’e família vítima la simu desizaun no ikus mai hamosu barullu entre parte rua iha Tribunál Primeira Instánsia Dili.
Prokuradór Alfónso fó hanoin katak desizaun ne’e seidauk finál, tanba hanesan desizaun husi Tribunál Primeira Instánsia no seidauk tránzitu ein-julgadu.
“Ida-ne’e dehan saida, seidauk metin, ne’e baibain la’o ona, iha ema mate omesidu sempre ne’e kuandu desizaun Tribunál sempre iha bainhira notifika ne’e Ministériu Públiku no notifika Advogadu parte rua,” nia akresenta.
Prokuradór Jerál dehan, agora bazeia ba lei Kódigu Prosesu Penál, dentru loron-30 tenke hola pozisaun.
“Entaun, ba desizaun ida-ne’e sei halo Ministériu Públiku iha estratejia prosesuál no apelu ba hotu-hotu tenke ho seriedade kalma tanba dalan nakloke seidauk tránzitu ein-julgadu, Ministériu Públiku sempre atua dentru barómetru legál,” nia katak.
Prokuradór esplika, tuir lei dentru legalidade no ba oin sempre hanesan ne’e nu’udar asaun titulár penál ne’ebé defende legalidade tenke tuir ida-ne’e.
“PJR sei prepara asaun tuir mai, ami iha estratejia asaun tuir mai, tanba kualker desizaun ita Ministériu Públiku sempre analiza no halo asaun, ita rona baibain rekursu ne’e. Dalan nakloke mak tempu faze analiza no despaisu ne’e sei deside. Ministériu Públiku kuandu ita haree presiza atu substitui karik Prokuradór, entaun ita deside Prokuradór seluk, kuandu PJR kontra nia desizaun entaun tenke buka pur despaisu nomea Prokurador seluk,” nia tenik.
Prokuradór defende, PJR no Ministériu Públiku sempre atua no respeita direitu ba ema hotu inklui garante direitu arguidu nian.
Jornalista : Nelson de Sousa
Editora : Julia Chatarina
