DILI, 03 Abríl 2025 (TATOLI)–Primeiru-Ministru (PM), Kay Rala Xanana Gusmão, kinta ne’e iha Palásiu Prezidensiál Dili hasoru-malu ho Prezidente Repúblika José Ramos Horta hodi relata progresu servisu Governu nian liuliu introdús Dekretu-lei ne’ebé Konsellu Ministru aprova ona kona-ba estabelese limite tinan 65 nu’udar idade obrigatóriu hodi ramata relasaun traballu funsionáriu públiku no ajente administrasaun públika nian.
Notísia Relevante: Governu halo alterasaun daruak ba Estatutu Funsaun Públika
“Ha’u informa ba Prezidente kona-ba horseik iha Konsellu Ministru aprova Dekretu-Lei ida kona-ba limite idade ba funsionariu públiku hotu, ami haree ona sistema ida katak tenke iha atu regula funsaun públika,” Xanana hateten ba jornalista sira hafoin remata enkontru ho Xefe Estadu.
Nia dehan, durante ne’e Governu akompaña sistema sira iha edukasaun, saúde no seluk tan ne’ebé hatama-hasai kontratadu no permanente maibé laiha konfiansa atu hala’o servisu.
“Ami haree hela ba idade nian, ba oin sei haree mós kona-ba saláriu mínimu maibé seidauk. Ida tan mak ne’e, iha sistema balun iha funsaun públiku funsionariu ida bele lisensa sem vensimentu, nia ba servisu fali iha fatin seluk manán osan boot, maibé ba iha ne’ebá la halo buat ida, buat ne’e mak ita tenke monta sistema ida para regula. Ida-ne’e mak ha’u informa ona ba Prezidente Repúblika, bainhira Dekretu-Lei ne’e mai nia bele asina ka aprova,” Xanana tenik.
Entretantu, Projetu Dekretu-Lei ne’ebé aprezenta hosi Ministru Prezidénsia Konsellu Ministru (MPKM) Agio Pereira, no hosi Prezidente Komisaun Funsaun Públika, Agostinho Letêncio de Deus, ne’ebé ho uzu autorizasaun lejizlativa ne’ebé hetan husi Lei n. 7/2024, loron 23 fulan-Outubru, halo alterasaun da-ruak ba Lei n. 8/2004, loron 16 fulan-Juñu, ne’ebé aprova Estatutu Funsaun Públika.
Diploma ida-ne’e estabelese limite tinan 65 nu’udar idade obrigatóriu hodi ramata relasaun traballu funsionáriu públiku no ajente Administrasaun Públika nian, ne’ebé sei akontese automatikamente iha loron ne’ebé traballadór atinje idade refere.
Medida ne’e hakarak atu promove joven sira ba kuadru Administrasaun Públika nian, garante renovasaun jerasionál no hadi’a kualidade no efisiénsia servisu ne’ebé presta ba populasaun.
Diploma ne’e determina mós katak Komisaun Funsaun Públika tenke notifika traballadór, ninia entidade empregadora no Seguransa Sosiál pelumenus loron 90 molok hakotu funsaun.
Iha situasaun sira ba interrese públiku ne’ebé fundamenta ho loloos, no bainhira labele substitui imediata traballadór ne’e, sei posivel atu prolonga hodi hala’o funsaun, tuir akordu hamutuk, to’o tinan 68. Diploma ne’e hahú vigora iha loron 1 fulan-Janeiru tinan 2026.
Jornalista : Hortencio Sanchez
Editór : Cancio Ximenes
