2025, MS disponibiliza vasina HPV doze rihun-20
DILI, 03 Abríl 2025 (TATOLI)—Xefe Departamentu Imunizasaun Ministériu Saúde (MS), Maria Angelina Pereira, hateten, tinan ne’e, MS disponibiliza vasina doze rihun-20 hodi kontra Papillomavirus Umanu (HPV) ba labarik idade 11 to’o 14.
“Ministériu Saúde sei kontinua programa vasinasaun HPV ba labarik sira ho idade 11 to’o 14 iha teritóriu laran tomak. Tinan ida-ne’e, planu atu fornese vasina doze 20.000 ba labarik feto sira tanba sira iha direitu atu hetan vasina HPV,” Maria Angelina Pereira dehan ba TATOLI iha nia kna’ar fatin, kinta ne’e.
Xefe departamentu ne’e garante katak profisionál saúde sira iha sentru no postu saúde sira sei tun bá eskola hodi fó vasinasaun ba labarik sira.
Notísia relevante: Labarik feto hamutuk 3.968 iha Covalima simu ona vasina HPV
“Iha sentru saúde hamutuk 72 no sentru saúde liu 300 iha munisípiu sira. Profisionál saúde sira sei planeia atividade vasina HPV no tetanus ba labarik tinan neen, inklui labarik mane no feto sira iha eskola,” nia esplika.
Maria Angelina hatutan parte MS servisu hamutuk ho Ministériu Edukasaun, hetan dadus kona-ba idade sira-ne’ebé bele hetan vasina HPV.
Nune’e, iha tinan 2024, profisionál saúde sira vasina ona HPV ba labarik feto idade 11 to’o 14 hamutuk 100,7% iha teritóriu nasionál.
Jornalista: Felicidade Ximenes
Editór: Xisto Freitas da Piedade
