DILI, 04 Abríl 2025 (TATOLI) – Instalasaun semáforu ba ema ho defisénsia sira iha kapitál, ne’ebé halo husi empreza Cyrus Unipessoal Lda falta de’it 5% atu konklui.
“Instalasaun ba semáforu ka sinál ba ema ho defisiénsia atinje ona 95% atu konklui iha fulan ne’e. Falta de’it mak finaliza pintura ba semáforu sira ne’e “, Diretór Empreza Chyrus Unipessoal Lda, Rui Martins, dehan ba Tatoli, ohin.
Semáforu ba ema ho defisiénsia ne’e empreza instala iha fatin lima iha kapitál mak hanesan iha Palásiu Governu nia oin, Fatuhada, Kintál Boot iha Polísia Militár nia oin, Kaikoli iha Ministériu Solidaridade Sosiál no Inkluzaun (MSSI) nia oin no Banku Nasionál Komérsiu Timor-Leste (BNCTL, sigla portugés) iha Obrigado Barrack.
Ministériu Transporte no Komunikasaun kontrata empreza Cyrus halo instalasaun ba semáforu ne’e ho orsamentu rihun $96-resin.
Iha sorin seluk, Xefe Departamentu Sekretariadu Apoiu Tékniku Administrasaun iha Diresaun Nasionál Transporte Terrestre (DNTT), Nelson Sequeira Martins, hateten bainhira empreza finaliza instalasaun semáforu ne’e maka parte DNTT sei bolu Asosiasaum Defisiénsia Timor-Leste (ADTL) hodi halo sensibilizasaun liuhusi vídeo ka filme badak ruma ne’ebé publika liuhusi rede sosiál.
“Atu ita-nia komunidade bele kompreende fatin no funsaun semáforu ba ema ho defisiénsia nian”, Nelson realsa.
Antes ne’e, Diretór-Ezekutivu ADTL, Cesário da Silva, dehan ADTL hanesan organizasaun ida ne’ebé durante ne’e halo advokasia ba asesibilidade iha Timor-Leste, ho intervensaun Minitériu Transporte no Komunikasaun ne’ebé hahú tau sinál sira iha Dili laran ne’e importante tebes no hatudu mudansa boot tebes ba dezenvolvimentu nasaun nian, liuliu atu asegura inkluzividade ba ema ho defisiénsia.
“Ita hahú ona asesibilidade iha fatin hothotu liuliu estrada públiku, tanba ita hatene ema ho defisiénsia atu ultrapasa ba estrada públiku sira ne’e difísil tebes ba sira, maibé agora hahú instala sinál ba ema ho defisiénsia ne’e di’ak tebes, sidade Dili sai sensivel ba hotu”, nia hato’o.
Notísia relevante: DNTT tinan ne’e sei monta sinál ba ema ho defisiénsia iha Dili
Jornalista: Arminda Fonseca
Editora: Maria Auxiliadora
