DILI, 03 Abríl 2025 (TATOLI)–Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, kinta ne’e, iha edifísiu Komandu Jerál PNTL, Kaikoli, hala’o enkontru ho Diretór Institutu Nasionál Nasionál (IDN), Guilherme Soares, hodi ko’alia kona-ba kooperasaun institusionál entre PNTL no IDN liuliu oinsá atu fó formasaun ba membru PNTL sira na’in-2.747 ne’ebé foin lalais hetan promosaun tranzitória.
Notísia relevante: Governu define regra promosaun tranzitória ba membru PNTL 2.700-resin
“Komandu sei prepara pedidu ba Ministru Interiór, Francisco da Costa Guterres ho Ministru Defeza nune’e bele konsidera kestaun sira-ne’e, hodi fasilita formasaun ba membru PNTL sira para sira bele garantia kualidade iha sira-nia servisu,” Henrique da Costa hatete bá jornalista sira bainhira kumprimenta Komunidade Musulmana iha Mesjid Annur, Kampung Alor, kinta ne’e
“Ita sei identifika idade hira to’o hira mak bele haruka bá kursu refere no husi diviza saida mak ita haruka bá iha-ne’ebá nune’e sira ramata kursu mai iha instituisaun ita sei bele utiliza sira iha tempu balun nia laran,” nia afirma.
Entretantu, Diretór Institutu Defeza Nasionál (IDN), Guilherme Soares, dehan hasoru-malu ho Komandu Jerál Polísia Nasionál hodi diskute kona-ba fasilita formasaun ba membru ne’ebé hetan ona promosaun diviza tranzitória.
“Komandante konvida ha’u mai iha-ne’e atu konsulta mós kona-bá sira-ne’ebé hetan promosaun trazitória foun, daudaun ne’e bele tuir formasaun iha IDN nian,” nia haktuir.
Nia informa Institutu Defeza Nasionál harii ho Dekretu-lei Nú. 12/2010, 26 Agostu, ne’e iha-ne’ebá hatuur pilár importante sira, mak dezenvolvimentu rekursu umanu ba forsa armada, servisu seguransa inklui hotu ba administrasaun públiku, sosiedade sivíl asuntu defeza seguransa nian.
Papél seluk husi Institutu Defeza Nasionál mak, ida halo divulgasaun iha área defeza no seguransa nian através husi kursu sira kuarta diresaun sira. Ida seluk mós bá iha traballu peskiza nian no jestaun institusionál.
Jornalista: Natalino Costa
Editór: Xisto Freitas da Piedade
