DILI, 04 Abríl 2025 (TATOLI)—Membru Komisaun G iha Parlamentu Nasionál (PN) ne’ebé trata asuntu Edukasaun, Juventude, Desportu no Sidadania halo fiskalizasaun ba Sentru Aprendizajen no Formasaun Eskolár (CAFE, sigla portugés) iha munisípiu Likisá no Ainaru, nune’e nota konstrusaun la’o tinan barak ona maibé seidauk ramata to’o agora.
Membru Komisaun G, Deputadu Mateus da Crus, haktuir, durante membru Komisaun G halo fiskalizasaun, traballadór sira hato’o keixa kona-ba seidauk simu saláriu hahú konstrusaun to’o agora.
“Eskola CAFE iha Likisá, depois fiskalizasaun eskola ne’e hahú konstrusaun tinan 2022 até agora 50% seidauk to’o, no piór liután ita-nia traballadór sira ne’e seidauk halo pagamentu komesa kedas iha tinan 2022 halo ke’e fondasi ba eskola ne’e,” nia hato’o iha PN, sesta ne’e.
Notísia relevante : Kontrusaun eskola CAFE iha Ainaru paradu
Nune’e, Deputadu Bankada Governu husi Kongresu Nasionál Rekonstrusaun Timorense (CNRT) ne’e husu ba ministériu relevante, liuliu Ajénsia Dezenvolvimentu Nasionál (ADN) atu halo fiskalizasaun ba projetu ne’e.
Iha fatin hanesan, Deputadu CNRT, Oscar de Araújo, foin lalais halo fiskalizasaun iha munisípiu Ainaru no deteta konstrusaun CAFE ida paradu durante tinan barak.
“Husu ba Ministériu Edukasaun atu haree konstrusaun CAFE ida munisípiu Ainaru ne’ebé paradu hela komesa tinan 2022 mai to’o agora,” nia tenik.
Reprezentante Governu liuhusi Vise-Ministru asuntu Parlamentár, Adérito Hugo da Costa, rejista preokupasaun ne’e no sei envia ba entidade tutela hodi tau atensaun.
Jornalista : Nelson de Sousa
Editora : Julia Chatarina
