DILI, 21 Marsu 2025 (TATOLI)-Diretór Servisu Edukasaun Munisípiu Ainaru, Patrício da Costa Magno, hatete ninia parte infoma ona ba Ministériu Edukasaun sobre kontrusaun eskola Sentru Aprendizajen no Formasaun Eskolár (CAFÉ, sigla portugés) iha Ainaru ne’ebé paradu.
Nia dehan ME liuhusi infraestrutura halo ona xamada daruak ba kompañia, tanba la kontinua servisu. “Ami informa no rekomenda ona ba Ministériu Edukasaun iha fulan-Janeiru liubá katak loke fali konkursu para konstrusaun ne’e bele kontinua la’o”.
Tuir dirijente, kompañia ninia kapasidade limitadu atu kaer obra ho orsamentu ne’ebé boot. Tanba ne’e, konstrusaun foin atinje pursentu 15. “Ida 15% ne’e osan fó ona maibé nia la kontinua entaun la transfere osan ona”, dehan.
Nia informa, kompañia ne’ebé responsabiliza ba konstrusaun eskola CAFE naran Roman Junior, ho nia orsamentu hamutuk $907.735.20, kontrusaun ne’e hahú iha tinan 2020.
Alende ne’e nia dehan tinan ne’e konstrusaun foun ba eskola ensinu sekundáriu tékniku vokasionál ida ho sala neen no konstrusaun ba ensinu báziku rua ho saladeaula tolu.
“Konstrusaun ensinu sekundáriu ne’e hahú ona no besik atu finaliza ona, tanba hahú konstrui iha 2022 to’o agora atinji ona 75%. Konstrusaun ba ensinu báziku iha rua, kada eskola sala tolu, sei la’o hela”, dehan.
Osan ba ensinu báziku rua ne’e nian hamutuk $80.000 no Ensinu Sekundáriu Tékniku Vokasionál (ESTV) $94.951.
Entretantu ensinu sekundáriu tékniku vokasional públiku iha Ainaru hamutuk tolu ho nia totál estudante 455, Ensinu Sekundária Jerál (ESJ) Públiku haat totál estudante 1,723, Ensinu Sekundária Katólika lima totál estudante 1.434, ensinu báziku iha 88 totál estudante 8.898, ensinu báziku Katólika 5 totál estudante 885, Pre-eskolár Públika 45 totál estudante 1.797, Pre-eskolár Katólika 5 totál estudante 157.
“Ita-nia manorin ne’ebé hanorin iha nivel eskolaridade iha munisípiu Ainaru hamutuk 1.074, manorin ba ensinu báziku 54, ensinu báziku 900, ensinu sekundáriu jerál 86 no ESTV iha 34.
Notísia relevante: Komisaun G-PN fiskaliza kondisaun edifísiu ME no husu Governu toma atensaun
Jornalista : Osória Marques
Editora : Rita Almeida
