DILI, 04 Abríl 2025 (TATOLI)-Ministériu Edukasaun (ME) sei konstrui saladeaula 42 ba eskola ensinu báziku iha territóriu eseptu Oekusi.
“Ministériu Edukasaun aloka millaun $1.2 hodi konstrui saladeaula 42 ba eskola 14 iha Baukau, Lautein, Likisá, Bobonaru, Ermera, Ataúru, Manatutu no Vikeke”, Diretór Nasionál Infraestrutura no Edukativu iha Ministériu Edukasaun, Hélio Lopes, dehan ba TATOLI iha nia knaar fatin, Vila Verde.
Direjente ne’e hatete, tinan ne’e tenke foka ba Ensinu Báziku, tanba maioria eskola nia kondisaun ladi’ak ona.
Nia dehan prosesu konstrusaun saladeaula iha prosesu aprovizionamentu no hein aprova mak bele anúnsia ba públiku.
Totál eskola iha territóriu nasionál konta hosi pré-eskolár to’o ensinu sekundáriu jerál tékniku vokasionál hamutuk 1.481, kompostu hosi tékniku vokasionál 42, ensinu sekundáriu jerál 55 no eskola ensinu báziku no pré-eskolár mak barak liu.
Diretór Servisu Edukasaun Munisípiu Dili, Sabino da Costa Pereira, hatete tinan ne’e Edukasaun Munisipál ida-ne’e laiha planu ba konstrusaun no reahabilitasaun maibé ministériu mak iha planu hodi konstrui.
“Ita autoridade edukasaun ne’e laiha planu maibé mak Ministériu Edukasaun sira iha planu atu halo konstrusaun ba eskola Fatumeta, ida ba Ensinu Báziku Sentrál Sergio Viera de Melo. Prosesu ne’e agora la’o hela, tanba kompañia foti hotu ona amostra (sampel), ita seidauk hatene bainhira mak hahú obra, maibé prosesu kontinua la’o hela”, nia dehan.
Alende ne’e nia dehan tan planu konstrui koziña ba merenda eskolár tanba iha eskola balun estudante aumenta barak.
“Koziña merenda eskolár iha maibé simples de’it. Ministériu Edukasaun iha ona planu no autoridade mós. Ita la’ós halo hotu-hotu kedas maibé ita halo faze pur faze, alende ne’e ita mós sei halo sala refetóriu inklui saladeaula”, dehan.
Nia hatutan sei halo identifikasaun ba eskola no ida-ne’ebé nesesariu duni. Tanba númeru estudante ba asesu merenda eskolár ne’e barak no aumenta kada-tinan.
“Ha’u hanoin Dili presiza halo nune’e, seguru no ijiene. Tanba koziña ne’ebé PNDS halo ne’e ladún sufisiente, tanba tein uza fugaun entaun labele responde ba labarik barak ne’e. Ne’ebé ba oin ami sei halo enkontru ida hodi planu konstrui koziña ho uza ai-sunu, nune’e bele responde ba labarik barak”, tenik.
Notísia relevante: ME–Instituto Camões asina MoU ba reabilitasaun saladeaula hitu iha EBC Farol
Jornalista : Osória Marques
Editora : Rita Almeida
