DILI, 03 Abríl 2025 (TATOLI)—Ministru Komérsiu no Indústria, Filipus Nino Pereira, enkoraja nafatin mikro, pekena no média empreza sira atu kontinua eziste hodi lori dezenvolvimentu bá-oin.
“Durante ne’e ita tama sai vizita mikro, pekena no média empreza sira hotu, ha’u la lembra ona fatin hira mak ita tama, maibé iha oportunidade ida-ne’e katak situasaun reál ne’ebé mak ita-nia mikro, pekena no média empreza sira eziste hela iha ita-nia nasaun, kontribui la’os de’it diversifika ekonomia ka kriasaun empregu, maibé sira mós kontribui ba selu taxa, entaun husu kontinua eziste nune’e bele lori dezenvolvimentu bá-oin,” Filipus Nino Pereira dehan iha Liquitai, Dili, kinta ne’e.
Notísia relevante: Governu kontinua promove mikro pekena no media empreza iha TL
Nia hateten, mikro, pekena no média empreza sira balun rejistadu iha SERVE, I.P, entaun ho hanoin ida-ne’e Governu tenke apresia no enkoraja nafatin atu kontinua eziste tanba ko’alia kona-ba dezenvolvimentu ekonomia, kreximentu ekonomia iha kontribuisaun reál maihusi setór, mikro no pequena média empreza sira.
“Governu nia apoiu ba mikro, pekena no média empreza ne’e la’ós dehan atu fó osan ka ekipamentu, maibé liuhusi atividade formasaun balun ita bele konvida sira hodi sira fahe esperiénsia no fasilita sira iha eventu feira,” nia konklui.
Jornalista: Felicidade Ximenes
Editór: Xisto Freitas da Piedade
