DILI, 03 Abríl 2025 (TATOLI)–Reprezentante Organizasaun Mundiál Saúde iha Timor-Leste (OMS), Arvind Mathur, hateten peritu malária sira sei to’o Timor-Leste iha 28 Abríl, tinan ne’e, atu halo avaliasaun finál hodi hakat bá sertifikasaun elimina malária iha rai-laran.
“OMS no Ministériu Saúde servisu hela ba prosesu eliminasaun malária iha Timor-Leste,” Arvind Mathur dehan ba TATOLI iha nia kna’ar fatin, Kaikoli, kinta ne’e.
Notísia relevante: Tinan ne’e, posibilidade TL hetan sertifikadu livre husi malária
Tuir reprezentante OMS ne’e, Timor-Leste kumpri ona rekizitu sira hanesan departamentu kontrolu vetór, formasaun ba profisionál saúde sira iha fronteira no kriasaun komisaun altu nível malária nian iha Timor-Leste.
“Iha avaliasaun finál kona-ba eliminasaun malária ne’e, karik susesu, sei hato’o relatóriu ne’e ba Diretór Rejionál OMS nian,” nia esplika.
Nia garante sei iha rezultadu pozitivu ba Timor-Leste hodi hetan sertifikadu eliminasaun ho rekomendasaun husi OMS rejionál.
Arvind Mathur esklarese katak ekipa MS no OMS hala’o hela peskiza kona-ba moras sira hanesan trakoma no lumbringa ne’ebé konsidera hanesan moras neglijénsia hodi hetan sertifikadu eliminasaun.
Jornalista: Felicidade Ximenes
Editór: Xisto Freitas da Piedade
