DILI, 07 Abríl 2025 (TATOLI)–Deputada Bankada Governu husi Congresso Nacional para a Reconstrução de Timor-Leste (CNRT), Cedelízia Farria dos Santos, sujere Governu atu aumenta estasionamentu ba veíkulu iha Dili.
“Akompaña foin daudaun Governu liuhusi Diresaun Nasionál Transporte Terrestre (DNTT) no Komandu Polísia Nasionál Timor-Leste (PNTL) hasai ona sirkulár ida hodi hateten katak, karreta no motoriza labele para iha estrada-ibun husi Estátua Nicolau Lobato Komoro to’o Ponte BJ Habibie. Konkorda ho sirkulár ida-ne’e maibé hakarak fó hanoin Governu atubele karik kria fatin estasionamentu karreta no motór,” Deputada hato’o liuhusi reuniaun plenária, Parlamentu Nasionál (PN), segunda ne’e.
Nia dehan, bainhira laiha estasionamentu mak sei difísil ba veíkulu sira, ezemplu hanesan iha área Parlamentu nia oin diresaun ho edifísiu Banku Sentrál Timor-Leste (BCTL, sigla portugés) nian ne’ebé agora la autoriza veíkulu bele para.
“Agora laiha ona fatin estasionamentu oinsá sira bele para atu mai keixa sira-nia asuntu ruma, inklui iha oin ne’e iha mós loja ida, kampus UNTL no fatin gym, hanoin fatin sira ne’e presiza parkiran ne’ebé bele ajuda ema mai trata sira-nia asuntu,” nia preokupa.
Notísia relevangte : AMD implementa estasionamentu ba transporte públiku iha Kristu-Rei
Deputada ne’e nota, iha Bebora besik iha postu abastesimentu kombustível ETO, mákina BNCTL no Ministériu Obra Públika nia oin inklui Ministériu Komérsiu Indústria nia kotuk ne’e sempre iha engarafamentu maka’as.
“Fatin estasionamentu ba órgaun Estadu de’it laiha, ezemplu Obra Públika para karreta de’it laiha, iha fali kotuk mós parkir laiha,” nia akresenta.
Deputada ne’e hateten, Governu bele hahú identifika ona fatin hodi halo estasionamentu hodi hamenus engarafamentu.
“Iha jardín ida iha fatin postu abastesimentu kombustível ETO nia oin, iha jardín ne’e ema nunka uza, bele halo estasionamentu. Se bele Governu identifika fatin ne’e uza fali ba estasionamentu para bele selu hodi hatama fali reseita ba Estadu. Presiza duni identifika tan fatin sira seluk kria estasionamentu, se lae ita tau hela sirkulár sira ne’e ho hanoin di’ak, maibé ita rezolve problema ida kria filafali problema seluk,” nia fó hanoin.
Aleinde ne’e, nota mós katak kada tinan karreta no motór sempre aumenta, tanba ne’e presiz aiha solusaun.
Reprezentante Governu liuhusi Vise-Ministru ba asuntu Parlamentár, Adérito Hugo da Costa, hateten, Governu daudaun ne’e haree ba pontu situasaun sira ne’e nune’e foin daudaun halo ona lei legalidade urbanístika ne’ebé tama vigór hodi kompleta tan norma sira seluk hodi bele halo jestaun ba sidade Dili neineik.
“Tanba sidade ne’e antigu, ita buka espasu ida luan hodi halo estasionamentu ba transporte públiku la fásil. Lalika ko’alia to’o parkiran ba kareta, atu halo de’it edifísiu públiku agora iha Dili mós la’ós fasil, tanba espasu menus ona, ne’ebé Governu sei halo jestaun ba ida-ne’e, saida mak ita halo otimaliza espasu públiku ne’ebé iha ona,” nia katak.
Governante ne’e dehan, konta mós ho kooperasaun sidadaun sira iha Dili, ne’ebé sira-nia rai privadu maibé bele iha konkordánsoa ho Governu fó espasu balun ho kompesasaun tuir lei hodi halo alargamentu espasu ba rodaviáriu.
“Maibé, ita labele iha espetativa ida katak Dili ne’e loke ba buat hotu-hotu, tanba labele ona, Dili ne’e sidade antigu a não ser ita iha sidade ida foun ona kapitál iha futuru ne’e buat seluk ona,” nia argumenta.
Jornalista : Nelson de Sousa
Editora : Julia Chatarina
